Miyerkules, Hulyo 18, 2007

Kaduha na kawati

IKADUHA na kining insidente sa pagpanulis nga nahitabo sa National Statistics Office (NSO) karong tuiga, butyag ni National Bureau of Investigation (NBI) Special Agent Arnel Pura.

Matod ni Pura nga niadtong Pebrero mga P50,000 ngadto sa P70,000 nga cash ang nahanaw usab.

Ang impormasyon gikan sa empleyado sa NSO nga si Felixberto Sato Jr. nga gipaubos ni Pura sa lie-detector text tungod sa nahanaw nga P230,000.

Si Sato, matod pang Pura, nisulti kaniya nga siyay nibayad sa nahanaw nga salapi.

Ang bag-ohay lang karon nga nahanaw nga P230,000 nga usa ka adlaw ni nga koleksyon ubos usab sa kustodiya ni Sato.

Si NSO-7 director Lilia Tandoc namahayag nga usa ka guwardya wa na mopakita human sa napahigayon nga polygraph test nga gidudahan nila nga posibling nahibawo sa nahanaw nga salapi.

Nitataw si Pura nga ang lie detector test ni Sato ug laing duha ka mga empleyado uban sa duha ka mga guwardiya pulos negatibo.

Base sa imbestgasyon, kadtong moadto sa vault diin nahimutang ang salapi moagi una sa guard-on-duty.

Nagtinguha si Pura nga motawag og ubang mga empleyado aron ipaubos sa lie detector test.

“We are still looking for possible subjects but if exhausted na tanan, ang accountable officers and posibling makiha for technical malversation,” nagkanayon siya.

Nasayran, nga si Cebu City Civil Registrart Evangeline Abatayo nipasabot nga gawas nag-andam ang NSO sa pagbalhin sa Sudlon sa Barangay Lahug, ang pagkahanaw sa salapi maoy laing rason nga gisira ang buhatan sa NSO nga nahimutang sa siyudad. (JECT/KNT sa Sun.Star Cebu)

(Hulyo 18, 2007 isyu)

Sunod nga balita: Pulis napusilan sa tulisan