Miyerkules, Hulyo 18, 2007

Pulis napusilan sa tulisan

PULIS napusilan sa dihang nakigpunislay sa mga mga tulisan didto sa lungsod sa Liloan.

Sa wa pa ang hitabo, ang kapulisan nakadawat og taho nga dunay nanulis og duha ka mga cell phone didto sa ilang lugar.

Nahitabo kini niadtong Dominggo pasado alas 9 sa gabii, didto sa barangay Yati.

Ang report nga nidangat sa Cebu Provincial Police Office (CCPO) niila sa napusilan nga si PO1 Teogenes Montejo Flores, sakop sa Liloan Police Station.

Si PO1 Flores nagpatrolya sa ilang dapit sakay sa patrol car uban sa mga sakop sa Barangay Intelligence Network (BIN).

Sa dihang niabot sila sa barangay Yati ilang nakit-an ang usa ka motorsiklo nga Aura kolor puwa, diin sakay ang duha ka wa mailhing mga tawo.

Ang mga pulis nga nagkaduol sa dapit mosuway unta sa pagsusi tungod kay didto man kini nag-parking gawas sa balay sa gituohang tigpayuhot og drugas sa ilang lungsod.

Apan wa pa gani makapaduol ang mga pulis ang duha nga sakay sa motorsiklo daling ningsibat.

Ninggukod ang mga pulis sa duha nga nipaingon sa sityo Tambu Lamac.

Sa dihang duol na kaayo ang mga pulis sa motorsiklo gipusil sila sa nagsakay sa luyo gamit ang wa pa mailhing kalibre sa pusil.

Si Flores nga maoy drayber sa patrol car nisuway sa pagbawos apan wa usab makaigo. (DRT)

(Hulyo 18, 2007 isyu)

Sunod nga balita: Babaye gitulsi, gihinol pa gyud