Lunes, Hulyo 23, 2007

SONA ni Pres. Gloria Arroyo sa Kongreso karong hapon

DI lang makita sa katawhan apan ilang matagamtaman ang labing importante nga benepisyo nunot sa nagtubo nga ekononimiya ning administrasyon ni Pres. Gloria Macapagal-Arroyo.

Mao kini ang tutokan ni Arroyo atol sa iyang State of the Nation Address (SONA) karong hapon sa Kongreso.

Gawas sa ekonomiya, ang presidente motuki sa di matarog nga pulitika ug social justice, matod ni Presidential Spokesman Ignacio Bunye.

Si Bunye niawhag sa tanan sa pagpamati sa SONA sa presidente nga makita ug mabati sa trimedia (radyo, TV ug mantalaan) karong adlawa.

Nitataw siya nga si Arroyo kombinsido nga iyang mga damgo alang sa nasod nga makab-ot pinaagi sa pagbubo sa salapi sa gobiyerno ngadto sa nagkadaiyang mga proyekto nga makabenepisyo ang katawhan.

Ipresentar sa presidente ang direksyon sa iyang mga tinguha sa mga mosunod nga tuig sa iyang termino.

Gawas niini, gikatakda nga hisgutan usab ni Arroyo ang kalambuan sa mga proyekto nga iyang nasugdan na karon sa nagkadaiyang dapit sa Pilipinas sama sa gibuksang mga karsada, aiport, pantalan ug mga farm-to-market roads.

Kining mga naasoyng mga dakong programa gipahigayon karon sa gitukod nga lima ka mga Super Regions nga naglangkob sa North Luzon Agribusiness Quadrangle, Central Philippines isip Tourism Center; ang Luzon Urban Beltway ug Mindanao nga gitumong nga mahimong Agribusiness Center sa habagatan ug ang IT Corridor.

Samtang, karong buntag ipahigayon ang piniliay sa mosunod nga Speaker sa Kongreso.

Si Kong. Pablo Garcia sa segundo distro sa Sugbo ug kanhi gobernador, maoy mosakbang kang House Speaker Jose de Venecia nga nagtinguha nga huptan lang gihapon ang puwesto sa ikalimang higayon. (JECT)

(Hulyo 23, 2007 isyu)

Sunod nga balita: Nagmasyar sa tigbakay sa Lorega gipusil, patay