 |
Dominggo, Hulyo 29, 2007 |
Tiguwang naligsan, napisat
Dennes R. Tabar, Superbalita
NALATA ang lawas sa usa ka 68 anyos nga babaye human malatayi sa ligid sa 10-wheeler truck nga iya sa lungsod sa Consolacion, Sugbo samtang laing upat ka mga tawo ang nangaangol.
Ang truck de karga nawagtangan og brake hinungdan nga nidasmag sa multicab ug ang multicab nibangga usab ngadto sa traysikol.
Nahitabo kini kagahapon pasado alas 9 sa buntag didto sa barangay Polpogan-1, lungsod sa Consolacion, Sugbo.
Si SPO1 Romulo Sasing, imbestigador sa hitabo nga nahinabi sa Sun.Star Superbalita, niila sa namatay nga si Fedila Gimao, taga barangay Mabolo, dakbayan sa Sugbo.
Matod ni Sansing nga kini naglambigit og tulo ka mga sakyanan, una usa ka traysikol (plate no. GT-2986) nga adunay tulo ka mga pasahero.
Samtang ang ikaduhang sakyanang mao ang multicab (plate no. YCU-902) nga iya sa Kimvara Corp., gimaniho ni Reymar Coligado, 27, minyo, taga barangay Polpogan.
Ang ikatulong sakyanan mao ang 10-wheeler truck nga iya sa lungsod sa Consolacion, Sugbo, gimaniho ni Henry Alin, 31, minyo, taga barangay Garing.
Base sa pasiunang imbestigasyon ang tulo ka mga sakyanan pulos nagsunod paingon sa dakbayan sa Sugbo.
Ang traysikol kansang drayber wa pa mailhi sanglit daling gidala sa tambalanan nihunong aron pasakyon si Gimao.
“Kini gud kunong tiguwang dunay anak diha sa may Polpogan nibisita sa iyang apo unya paingon na pod pauli mao tong mosakay unta sa traysikol,” asoy ni SPO1 Sasing.
Sa dihang nihunong kini, ang multicab nga nagsunod sa traysikol nihunong usab sanglit di man siya maka-overtake.
Apan ang trak de karga kalit lang nidumbol sa multicab ug ang multicab nidumbol usab ngadto sa traysikol.
Si Gimao nga paingon na unta sa pagsakay gumikan sa kakusog sa bangga, nalabay human motuyok ang traysikol.
Hinungdan nga naligsan gyud ang biktima sa trak nga niresulta sa pagkamatay niini diha-diha.
Gibutyag ni Sasing nga nadaro pa ang duha ka mga sakyanan sa trak de karga mga 70 metros ang gilay-on gikan sa nahitaboan. (DRT)
(Hulyo 29, 2007 isyu)
Sunod nga balita: Naghikog kay gilibak
