Dominggo, Hulyo 29, 2007

Naghikog kay gilibak

WA makaaguwanta sa mga tabi-tabi nga nakamantsa sa iyang pagkababaye usa ka katabang naghikog gumikan sa kauwaw.

Si PO3 Manolito Abellanosa, homicide section sa Lapu-Lapu City Police Station, niila sa naghikog nga si Dimple Riel, 27, dalaga, lumad sa Butuan City.

Si Riel katabang sa managtiayong Edmund ug Diana Sayam sa sityo Carajay, barangay Gun-ob, Lapu-Lapu City.

Base sa initial nga imbestigasyon, naabtan pa ni Edmund Sayam gikan sa trabaho si Riel nga nanglimpyo sa balay kagahapon sa sayo sa buntag.

Sa dihang gipangita kay may isugo kaniya, nakita na lang sa managtiayon nga nagbitay na ang ilang katabang sa dirty kitchen ginamit ang nylon nga pisi nga gihigot sa iyang liog.

Si Abellanosa nagtuo nga ang hinungdan sa paghikog sa biktima gumikan sa tsismis o tabi-tabi gikan ra usab sa mga higala niini nga nibulgar nga nakighilawas si Riel ngadto sa iyang hinigugma.

Nakompirmar kini kay nakakuha ang kapulisan og suicide note gikan sa namatay nga gisuwat ngadto sa Grade I sheet nga papel gamit ang blue nga ballpen.

“Nagpakamatay ko tungod nila ni _____ ug ______, tanan trabahante sa Pusoan. Gipakaulawan ko nila,” tipik sa suicide note ni Riel.

Natala usab didto nga adunay nagtinguha nga mapahawa si Riel sa iyang gialagaran nga amo kay gikasuyaan siya niini, ilabi na nga taodtaod na siyang nag-alagad sa managtiayong Sayam. (FQB)

(Hulyo 29, 2007 isyu)

Sunod nga balita: 17 anyos naunay, kinatawo naigo