Dominggo, Hulyo 29, 2007

17-anyos naunay, kinatawo naigo

SAMDAN sa iyang kinatawo ang usa ka lalake human giingong naunay sa iyang armas didto sa lungsod sa Alcoy, Sugbo.

Apan paglabay og usa ka adlaw gikan sa hitabo nibutyag na usab kini sa mga imbestigador nga aduna gayoy tawo nga nipusil kaniya.

Ang biktima mao ang 17-anyos nga lalake, tinun-an sa grade 5, taga barangay Nug-as.

Base sa pasiunang imbestigasyon ni PO3 Eduardo Santander, pasado alas 8:00 sa gabii ang biktima naunay sa iyang armas.

Ang .38 paltik revolver gipasok sa iyang hawak apan aksidenteng nibuto hinungdan nga niigo sa iyang kinatawo ug walang bagtak.

Ang biktima daling gidala sa Alcoy District Hospital, apan sa pagkasunod adlaw si PO2 Allan Medel kinsa nipahigayon og imbestigasyon niingon nga nausab ang unang pamahayag sa biktima.

Kini human nibutyag nga di tinuod nga naunay siya sa iyang armas.

Matod niya nga gipusil siya sa wa mailhing tawo apan nahadlok lang siya ug naglibog kon mosulti ba siya sa kapulisan sa tinuod nga hitabo.

Gani iyang gibutyag nga atol sa insidente aduna siyay kuyog nga iyang higala nga si Jerome Seciban ug giingon nga mao ang tuyo sa tawo nga nipusil kaniya, apan siya ang naigo.

Hinuon sa pagka karon, ang kapulisan padayon pa sa ilang gihimong imbestigasyon aron masuta kon unsay tinuod nga nahitabo. (DRT)

(Hulyo 29, 2007 isyu)

Sunod nga balita: Anak sa pulis namusil