 |
Dominggo, Hulyo 29, 2007 |
Editoryal: Pangurakot sa DPWH
WAY di motuo nga di grabi sa pangurakot ang Department of Public Works and Highways (DPWH).
Ug kini nitumaw sa survey sa mga negusyante nga gibuhat sa SWS.
Maaninaw sab kini kanato sa mga balita sama niining mga multi-million nga mga anomaliya sa mga sa pagpalit ug pagtaod og mga spy camera, ang mga decorative lamp post, ug kadtong pag-aspalto isip preparasyon sa Asean Summit.
Basi sa mga napatk sa mga mantalaan, gigamit intawon sa mga ukoy nga naa sa DPWH ang dakong hitabo dinhi sa Sugbo aron makakuwarta.
Apan ato lang klaruhon nga ang DPWH tipik sa mas dakong sistema sa pag-apod-apod og giingong SOP.
Di makakuwarta pananglitan ang mga kurakot nga kongresista kon di kumplot ang mga kurakot sa DPWH sa pagbuhat sa mga proyekto ginamit ang pork barrel funds. Kining mga proyektoha ihulagway diha sa media nga tungod sa ilang pagbati alang sa katawhan.
Di makakuwarta ang mga kurakot nga dagkong opisyal sa kagamhanan ginamit ang mga proyekto sama pananglit niadtong mga decorative lamp post ug kining giingong anomaliya sa aspalto kon di kumplot ang DPWH.
Tipik ang DPWH sa sistema sa pangurakot.
(Hulyo 29, 2007 isyu)
