Lunes, Septiyembre 1, 2008

Rambol sa Mango, 1 patay

USA ang patay ug lima ang nangaangol sa duha ka managlahing insidente sa rambol sa mga imnanan sa dakbayan sa Sugbo kagahapon sa kaadlawon.

Samtang usa sa mga suspek napusilan sa usa ka sakop sa Special Weapons and Tactics (Swat) human usab nakigpinusilay sa nirespondeng mga pulis.

Nakabsan sa iyang kinabuhi si Hermie Sumampong, 37, human maoy naigo sa pagpamusil nga nahitabo pasado alas 2 sa Boss Grill Videoke and Fastfood sa Mango avenue.

Si Sumampong nga higala sa waiter sa nahisgutang imnanan nga si Ernest Arombo nag-estambay lang sa dapit.

Tumong untang pusilon mao si Arombo apan si Sumampong maoy naigo sa liog.

Sigon sa report sa Homicide Section nga sa wa pa ang pagpamusil, dunay nahitabong rambol tali sa grupo nila ni Jay Martinez ug George Magsalay.

Daling nakaresponde ang mga sakop sa Swat nga gipangulohan ni SPO1 Renante Nioda ug gidala ang lima ka mga lalakeng nalambigit sa kagubot human gireklamo og alarm and scandal, malicious mischief ug physical injuries sa tag-iya sa bar ug mga empleyado.

Human sa usa ka oras, nibalik ang grupo ni Martinez ug sa way igong hinungdan gipusil si Arombo.

Suwerteng wa maigo si Arombo apan si Sumampong maoy nakasawo sa bala.

Nag-iyahay dayon og sibat ang mga suspek hinungdan gigukod sila sa mga sakop sa Swat ug Mobile Patrol Group (MPG).

Nasigpatan sa grupo ni Nioda si Martinez sa may eskina F. Manolo ug Queen’s Road apan giunhan hinuon sila og pusil maong nibawos og pusil ang mga pulis nga niresulta sa pagkaigo sa tuong paa niini.

Nasikop usab uban kang Martinez ang iyang kuyog nga si Nicolas Gomez, 26.

Na-recover gikan kanila ang usa ka stainless .38 snubnose paltik revolver, tulo ka mga bala ug duha ka mga kabhang.

Ang lain nilang kauban nga si Jun Oyao, 19, nasikop sa sakop sa Artaf nga si Edwin Sescon sa may Redemptorist ug nasakmitan og .38 paltik nga may tulo ka mga bala ug usa ka kabhang.

Ang tulo ka mga suspek mga residente sa dan Andres Abellana ning siyudad.

Ang samarang si Martinez gidala hinuon sa Cebu City Medical Center (CCMC) samtang gitanggong na karon sila si Oyao ug Gomez.

Gisuwayan usab og dala sa CCMC si Sumampong apan nakabsan gyud sa iyang kinabuhi.

Una niini, laing rambol ang nahitabo pasado ala una sa kaadlawon sa Formo, Banilad.

Gipangsikop ang managsuong Michael ug Carl Caputolan uban sa usa ka Rommel Tan, mga residente sa San Roque, Mambaling human gireklamo og acts of lasciviousness ug physical injuries nila ni Robert John Velasco, Edwin Canco, Judith Encencio ug Divine Lopez.

Sigon sa report sa Mabolo police station nga samtang nanayaw sila si Encencio, 39, ug Lopez, 36, kalit lang nga giduot sa usa sa mga suspek ang likod ni Encencio.

Samtang ang laing duha ka mga suspek giingong nibunlot sa bukton ni Lopez ug gipaatubang kanila.

Dihang nakit-an sa ilang mga kuyog ang insidente, nisuway og badlong sila si Velasco ug Canco apan giingong gihapak na hinuon sila og botelya hangtod nga niulbo ang kagubot.

Samdan sa ulo ug agtang si Velasco ug nabun-og usab si Canco.

Apan ang mga suspek nga giingong gitabangan usab og bun-og maoy nalandig sa Perpetual Soccour Hospital kay nagrabihan.

Nagisian sa iyang nawong si Tan samtang nasamdan usab sa tiil si Michael.

Ang mga suspek didto na gi-pick-up sa kapulisan sa ospital human gidakop pinaagi sa citizen’s arrest sa bana ni Lopez nga si John Kenneth.

Pag-abot sa Mabolo police station, ang mga suspek nisumbalik usab og reklamo batok sa mga biktima sa kasong physiscal injuries.

Matod nila nga sila maoy gihapak og botelya ug gani gipatid-patiran pa ni Velasco si Tan maong ni-rescue lang si Michael apan giapil hinuon og kulata. (CPL)

(Septiyembre 1, 2008 isyu)

Sunod nga balita: Lungsod di samukon: awhag ni Loot