Lunes, Septiyembre 1, 2008

Lungsod di samukon: awhag ni Loot

KUSGANONG nag-awhag si Daanbantayan Bise Mayor Ma. Luisa Loot sa kampo sa ilang kaatbang nga si Augusto “Itok” Corro nga di samukon ang ilang lungsod.

Matod ni Loot, bisperas sa ilang piyesta atol sa koronasyon sa festival queen, dunay giingong mga tawo nilang Corro ang nanuroy nga nagpahibawo nga di patambungon ang mga tawo kay dunay bomba nga gibutang sa dapit pahigayonan sa kalihokan.

Nidugang siya nga niadtong Sabado sa gabii ang empleyado sa ilang munisipyo gidunggab sa pito ka mga tawo didto sa ilang merkado dihang nagkolekta kini sa bayranan sa mga naninda apan gipalakat sa ilang kaatbang nga nang-harass ang naasoyng empleyado sa mga naninda.

“Di nalang gubton ang lungsod ba. Kon ako iyang tuyo ayaw iapil ang lungsod,” hangyo sa bise.

Iyang gihulagway nga kon magpadayon ning mga gibuhat sa kampo ni Corro hayan madaut ang reputasyon sa ilang lungsod.

Niadtong Sabado sa gabii, si Filomeno Caparoso, 56, taga barangay Calape, gisugo sa ilang municipal treasurer aron kobrahan ang mga nagtinda sa ilang merkado nga giingong di taga lungsod.

Matod ni SPO2 Nero Manzanares nga si Caparoso nangasaba sa pito ka mga tawo naninda kay wa kini mobayad sa buhis sa ilang pagbaligya unya nasakitan sila sa gihimo sa biktima hinungdan nga gidunggab kini.

Nitataw si Manzanares nga gibuak ang botilya sa Red Horse ug mao kini ang gidunggab kang Caparoso hinungdan nga nasamad ang iyang nawong.

Gidala ang biktima sa Daanbantayan District Hospital aron katambalan ang iyang nahiaguman nga samad.

Si Daanbantayan Mayor Sun Shimura nihimo dayon og imbestigasyon niadtong Sabado sa gabii ug nasuta nga si Caparoso lakip sa nibantay sa gate sa dapit nga gipahigayon ang Haladayag Festival.

Si Loot nitumbok nga pito ka manindahay nga gikan sa lungsod sa Minglanilla ang gikolektahan ni Caparoso ug kay lagi kolektor man kini unya gisugo sa ilang municipal treasurer isog gyud kini.

Nasuko ang naasoyng mga manindahay ug gikulata hinuon si Caparoso ug wa matagbaw ilaha kini nga gidunggab.

Apan, lahi ang gipalakat nga estorya sa ilang kaatbang kay ang ilang mga tigpaluyo nga naninda sa merkado gipang-harass ni Caparoso.

Nagduda si Loot nga nagdalag mga tawo silang Corro sa ilang dapit aron lang gyud ipagubot ang ilang lungsod.

Sa iyang bahin, si Corro nagkanayon nga dakong bakak ang taho nga momugna siya og kasamok sa lungsod.

“It’s a big lie. Sila ang nagmugna ini nga mga kasamok. Di ingon ana ang akong pagkatawo. All I want is a peaceful Daanbantayan,” nagkanayon siya.

“Anad na gyud kaayo sila ana nga style, tan-aw nako di na kana mahalin karon panahona kay ang katawhan sa Daanbantayan nakahibawo na unsa ang mga Loot,” dugang padayag niya sa Sun.Star Superbalita. (JECT)

(Septiyembre 1, 2008 isyu)

Sunod nga balita: Multicab nahulog sa pangpang, 10 naangol, 1 kritikal