Lunes, Septiyembre 1, 2008

Multicab nahulog sa pangpang, 10 naangol, 1 kritikal

NAPULO ka mga tawo ang nalandig sa Cebu City Medical Center (CCMC) usa kanila ang kritikal human mahulog ang gisakyang multicab sa 50 ka tiil nga pangpang sa bukirang barangay sa Bonbon, dakbayan sa Sugbo.

Giila ang mga biktima nga sila si Carl Creus, anak og sakop sa Airforce nga maoy drayber sa multicab; Princess Hernandez, 19; Arfe Baculi, 17; Analyn Cabrera, 25; Nelan Cabiolo, 16; Wilmar Rabuyas, 20; Arnold Montejo, 21; Geralyn Casinillo, 16; Rofe Billacura, 25, ug Marcelina Tabares, 43.

Si Tabares nga giingong usa sa tulo ka mga tawong igo rang ni-hitch sa sakyanan ang naa sa kritikal nga kahimtang.

Sigon sa report sa Traffic Division nga ang grupo ni Creus gikan nga namista sa nahisgutang dapit.

Mga alas 3 kagahapon sa kaadlawon dihang mamauli na unta sila sa Sudlon.

Sanglit hubog na si Creus, wa na kini makontrol sa dagan sa sakyanan dihang nagmaniobra sila sa dulhugon ug tangasong bahin hangtod nga nahulog sa pangpang.

Mga barangay tanod sa dapit mao nay nagluwas sa mga biktima ug gidala sa ospital sa siyudad. (CPL)

(Septiyembre 1, 2008 isyu)

Sunod nga balita: Nadela: Mga senior citizen