Lunes, Septiyembre 1, 2008

Nadela: Mga senior citizen
Asoy ni Junrey Nadela

BAKOL ug kadtong dunay kakulian sa panlihoklihok gipanalipdan sa usa ka balaod pinaagi sa paghatag kanila og lingkoranan sa front seat sa mga jeepney ug rampa alang sa mga edipisyo.

Taudtaod na ang balaod apan daghan pa gihapon mga edipisyo nga way rampa ug mga jeepney driver ang mosaylo lang sa mga bakol. Gawas nga sayloan lang di sab mahigalaon sa mga bakol ang desinyo sa front seat ning mao nga mga jeepney.

Unsaon nga wa may gilatid nga sukod ang balaod mao nga kining mga jeepney nga ang makina Elf lisod na gyud masakyan sa mga igsuon natong bakol.

Gawas sa mga bakol apektado sab ini ang atong mga senior citizens. Sa mga oras nga tingsakay luoy kaayo ang atong senior citizens nga di makasugakod og sakay tungod kay mag-ilogay man ang mga pasahero.

Di kaha maayo nga ang atong mga konseho magpanday og ordinansa nga magsilot niadtong mga driver nga di mopasakay og mga senior citizens. Sa ato pa diha sa mga jeepney loading area mag-una na og sakay ang mga tigulang di kay iwakli lang.

Obserbahi ra gud ninyo matag hapon ilabi na sa adlaw nga dunay klase. Luoy lagi kaayo ang mga tigulang nga halos na lang maumod pag ginukod sa jeepney. Asa’y maayo og palinyahon na lang nato ang mga pasahero diha sa mga PUJ loading and unloading area.

WAY BATASAN

Bisan gani kong di tingsakay, mga kanahan sab kaayo ning ubang pasahero. Magsige og irog padulong sa ganghaan sa jeepney. Ang resulta puwerte na sab nga luoya ang mga tigulang nga mosakay. Inay nga unya’g sakay sa tigulang modiretso na ni og lingkod pabor sa entrance unsaon nga magsige man sab og irog ang mga pasahero padulong sa entrance mao nga ang luoy nga tigulang kinahanglan pa nga mopaso padulong sa likod sa driver.

Taga Department of Social Welfare and Development (DSWD) pagka paita ning kahimtanga. Di sayon kanang moyuko ka unya mag-aginod padulong sa tumoy nga bahin sa lingkuranan sa jeepney. Wa lang gyu’y batasan kining ubang pasahero. Maayo ra ba unta og di li ni sila matigulang.

BUS

Ang sulbad ra gyud ini mao kining gipangandoy nga bus ubos sa mass transit program sa Cebu City government.
Nahisgutan na nako ni sa nanglabay nato nga lindog apan kung madayon kini nakasiguro ko nga maka byahe na sa komportable nga paagi ang atong mga pinangga nga senior citizens.

Sa mga bus stop pa lang daan di na sila kinahanglan nga mokatkat pa sa bus. Tupong ang bus stop og ang salog sa bus mao nga sayon na kaayo ang pagsakay. Mao nga di tren kun di bus maoy sikat didto sa Coritiba, Brazil.

(Septiyembre 1, 2008 isyu)

Sunod nga balita: Pari, sakristan naospital human sabangga’