Lunes, Septiyembre 1, 2008

Pari, sakristan naospital human sabangga

PARI ug ang iyang sackristan naangol human napasok ang ilang awto sa nag-urong nga Fuso Fighter Truck pasado alas 4 niadtong Sabado sa kaadlawon sa South Poblacion, lungsod sa San Fernando.

Nalandig sa South General Hospital sila si Fr. Luigi “Kent” Cañete Martinez, 37, taga Tolo-Tolo, lungsod sa Consolacion, ug ang iyang sakristan nga si Alvin Redoble human nangaangol.

Sigon sa report nga luwan sila si Martinez ug Redoble sa Hyundai Sedan (GTV-974) nga gipanag-iya ni Nenita Anchubas ug paingon unta sa Lindugon, Simala, Sibonga alang sa alas 6 nga misa.

Giingong ilang nasugatan ang Ceres bus mao nga nilihay sila apan didto na hinuon napasok sa Fuso Fighter Truck (GAQ-160) nga naaberiya niadtong higayona hinungdang nag-urong lang sa dalan.

Giingong way early warning device nga gibutang ang driver sa trak nga si Joseph Tayarong, 27, taga siyudad sa Zamboanga.

Daling gidala ang duha ka mga biktima sa South General Hospital apan nakagawas na hinuon kagahapon sa udto. (CPL)

(Septiyembre 1, 2008 isyu)