 |
Lunes, Septiyembre 1, 2008 |
Editoryal: Anugot massacre
NAHIMONG dakong balita karon ang masaker sa pamilyang Anugot kaniadto pang 1985 dihang giugkat sa militar ang gilubngan sa ilang mga lawas ug gipasanginlan ang mga rebeldeng New People’s Army (NPA) sa maong linuog nga krimen.
Dakong isyo unta kini batok sa mga rebelde kay mahimo kining pruweba sa kabangis sa maong grupo.
Apan niguwa karon ang kamatuoran nga naimbestigar na diay kini kaniadto pang ilawom pa kita sa balaod militar.
Nahimong dakong kontrobersya ang maong massacre ug ang Arsobispo sa Sugbo nga si Ricardo Cardinal Vidal mismo ang ni-commission og usa ka fact-finding mission niadtong tungora aron sa pagsusi sa maong hitabo didto sa Mayana, Gaas, Balamban.
Gani, na-exhume na ang maong mga lawas subay sa maong fact-finding mission ug kuyog sa pag-ugkat sa maong mga lawas ang mga sakop sa PC-INP kaniadto.
Tungod niini, makapangutana kita nganong gibanhaw kining maong masaker sa militar ug ilang gipatuo ang publiko karon nga bag-o kini nila nga nadiskubrehan.
Moguwa hinuon nga magpabuto ang militar og bisan unsang isyo basta lang maka-score og propaganda victory.
Ang nakaapan kay nikagar.
(Septiyembre 1, 2008 isyu)
