 |
Lunes, Septiyembre 1, 2008 |
Barrita: Pagbaligya sa CCMC
Eddie O. Barrita
Tikdul-Tikdol
NAMAHAYAG si Cebu City Mayor Tomas Osmena nga iyang ibaligya ang Cebu City Medical Center (CCMC) tungod sa di maayong serbisyo sa maong ospital.
Mao bitaw nang gitawag ang CCMC kaniadto nga usa “Mona Lisa” hospital, kay sama sa maong kanta, ang mga pasyente “they just lie there and they die there.”
Unsaon nga wa man say laing kadangpan.
***
Gilisdan si Mayor Osmeña sa pagreporma sa CCMC.
“It’s hard to do any reform at CCMC because they have culture of thinking only of themselves,” matod pas halangdong mayor.
Sa ato pa, kon di nimo mapanindot ang serbisyo, ibaligya. Hospital mo diha, hospital mo.
***
Nabalaka ang mokabat sa 500 ka mga kawani sa CCMC ingon man ang libo ka libong mga kaigsuonan natong mga kabos ang anha magpatambal sa CCMC kay di kasapar sa mahal kaayong mga pribadong hospital.
Maayo ang mayor maka-afford man bisan pa gani adto magpatambal sa gawas sa nasod.
Malalim ba nang mga pribadong hospital nga matod pas taga Cabadiangan, morag taxi nga gi-parking, naghunong pero ang metro nagdagan.
****
Matod sa mayor, duha ka eskuylahan, ang University of San Carlos ug ang University of Cebu, interesadong mopalit sa CCMC.
Ang mopalit, matod niya maoy moabaga sa katunga sa termination fees sa mga kawani sa maong tambalanan.
Ang halin gamiton aron ipa-enroll ang kabos nga lomulupyo sa dakbayan sa Philippine Health Insurance Corp. (Philhealth) nga di ra ba kompletong a hospitalization coverage.
***
Supak si Cebu City Vice Mayor Mike Rama nga ibaligya ang CCMC.
Gawas pa, makuti ug taas ang proseso sa pagbaligya niini kay nagkinahanglan pag kinig pag-uyon sa konseho.
Madugay kon wa kay rubber stamp.
Pero mahimong mapugngan ni ni Mike Rama kon mahimo na siya mayor sa dakbayan.
***
Dunay niingon nga basin napurdoy na ang dakbayan sa Sugbo kay ibaligya na man ang CCMC.
Di tingali. Basin mas sayon lang nga ibaligya ang CCMC kay sa South Road Properties (SRP).
Kon ang Cebu Investment Promotions Center maoy pabaligyaon sa CCMC, hayan sab nga di ni mahalin sama sa SRP.
***
Mobalik sa kahanginan karong adlawa ang banggiitang komentarits nga si Choy Torralba.
Ang iyang programa nga “Tug-ani ang Lungsod” mabati sa dyRF “Radio Fuerza” gikan sa alas 10:00 sa buntag hangtod sa alas 12 sa udto sugod karong adlawa uban sa
iyang kaubang komentarits nga si Kits Callejan.
(Septiyembre 1, 2008 isyu)
