Lunes, Septiyembre 1, 2008

Bañoc: Mga pari
Ruphil Bañoc
Birada

ANG mga pari sama ra sab natong tanan. Kamaong malipay ug masuko. Sama kanato dunay usab silay mga responsibilidad ug gahom. Tinood nga daghay magpanuko manaway sa mga pari, apan isip magtotoo dili pwede nga mopiyong na lang tas atong mga mata kung mohimo ug mga di maayong lihok ang atong ubang mga pari.

Daghan na ang pagtoon nga nagpakita nga sa tibook kalibutan nagtigamay ang gidaghanon sa tawo nga mosimba , ug wa koy pagduda nga usa sa mga hinungdan niini ang salawayon nga buhat sa uban natong mga tawong-simbahan, hilabi na gayud ang pari.

Matud pas katigulangan, ang mga pari, magtutudlo ug pulis maoy labawng gitahod sa mag tawo sa mga nanglabayng panahon. Ambot lang sa langaw kung naa pa bay nahibilin nilang tulo. Di ikalimod nga daghan sa atong kaparian nagpuyo sa kinabuhi nga gipuy-an ni Kristo. Puno sila sa luho, makita sa mga kahilayan, ug sa ilang mga parokya motupong ni Marcos ang pagkadiktador ug pagka-aroganti.

Tan-awa ra gud ning gihimo sa pari sa Inayawan nga si Fr. Domingo Saladaga nga nagdumili pagpahigayon ug misa diha sa chapel sa maong barangay sa mga rason nga lisod sabton — kung gamiton ta ang di kaayo hait nga pong.

Human sa kapin kon kuwang usa ka gatos ka tuig way problema may labut sa pagpahigayon sa misa dihang dapita hangtod nga si Fr. Saladaga miabot.

Gihatag ang rason nga dunay away may labut sa yuta. Nganong wa man gihunong ang misa dihang padayon ang court litigation? Pero niining Enero giundang ang misa bisan tuod human na ang away o wa nay away sa yuta. ”Labing tinood, dili na under court litigation, naa nay desisyon,” matud sa pari. Una niyang gihatag nga rason mao nga wa pa gi-donate ang nahisgutang yuta. Apan sa dihang ato gipangutana nganong aduna may daghan nga mga lugar diin dunay misa bisan tuod wa panag-iyaha sa simbahan ang lote o yuta, nitubag ang pari nga at least kuno gidumala ang maong kapilya sa BEC (Basic Ecclessiastical Community), hinungdan nga kini misahan.

Pagklaro ug pagsure, padre.

Di malalis nga daghang mga chapel nga pribadong gipanag-iya, apan gimisahan man sama sa mga tulunghaan ug business establishments. Subaya kuno kung duna bay lohika (logic) ang pamahayag sa pari.

Nia pay lain. Matud sa pari, naparalyze ang administrator nga si Ernesto Maneja. “Naparalyze na ra ba, giataki.” Mao kuno nga ato iampo. Apan atong nahibaw-an nga abtik, makabarog ug dili paralisado si Mr. Emiliano Maneja.

Parisiyo.

(birada_ruphil@yahoo.com)

(Septiyembre 1, 2008 isyu)