 |
Lunes, Septiyembre 1, 2008 |
2 ka round ra
SA tanang mainitong mga binaharay, ang gipangbuhian sa mga Pinoy mao ang natuman batok sa langyawng mga kaatbang sa miaging gabii sa “Night of Champions” boxing promotion sa Waterfront Hotel sa Lahug, Cebu City.
Si ALA boy Rey “Boom-Boom” Bautista (26-1,19KOs) nitumba kang Mexican Eden “Anestecista” Marquez (16-4-3, 13KOs) sa 2nd round aron depensaan sa ikatulong higayon ang iyang World Boxing Organization (WBO) Inter-Continental super bantamweight title.
Gipakamang sab ni ALA boy Donnie “Ahas” Nietes (23-1-3, 13KOs) sa 2nd round si Nicaraguan Eddy Castro (12-4-1, 9KOs) aron depensaan sa labing unang higayon ang iyang World Boxing Organization (WBO) mini flyweight title.
Samtang ang 16 anyos nga ALA boy lightweight Jason Pagara (15-1, 9KOs) nakatuman sab sa iyang bahad nga ang iyang paundangon sulod sa upat ka rounds si Thai Kongdej Sithtrajtrakan (17-16, 6KOs) sa usa ka non-title bout.
Human naestudyohan ang estilo sa kontra sa 1st round, si Bautista wa na mag-usik og panahon dihang nakalusot ang iyang makusog nga left cross sa apapangig nga
maoy nakatumba kang Marquez.
Nakabarog pa hinuon si Marquez apan giataki na sab siya pagbalik ni Bautista hangtod nga naigo na sab siya sa laing makusog nga left cross nga nagpabarag na sab kaniya.
Wa na gyud lung-i ni Bautista si Marquez niadtong higayuna hangtod nga natumba’g balik ang naulahi sa ika-1:08 minutos sa 2nd round ug giundang na sa referee ang away.
“The good thing with Boom-Boom now is that he has matured already after that 1st round loss to Ponce De Leon. Nakita nato nga iya pang gitan-aw ang style sa kontra sa 1st round, that’s why wa gyud dayon siya mo-attack which is missing during the De Leon fight,” pasabot sa manager ni Bautista nga si Michael Aldeguer.
Tungod sa impresibong kadaugan, posibleng makaaway si Bautista sa undercard sa gikaintapang engkuwentro nila ni Oscar De La Hoya ug Manny Pacquiao karong Disyembre 6 sa MGM Grand Hotel sa Las Vegas, USA.
“Boom-Boom’s confidence is back. We really hope that the Golden Boy will put him in the undercard of the Pacquiao-De La Hoya fight,” dugang ni Aldeguer.
Sa iyang bahin, si Nietes nipatuod nga bisa’g kapin sa tuig siyang wala nakaaway, wala gihapon siya matay-i ug naa gihapon ang iyang kanhi katakos.
Sa 1st round pa lang, gipakamang na ni Nietes si Castro pinaagi sa makusog nga right uppercut nga mitugpa sa apapangig. Nakabarog ra hinuon si Castro ug nakatiwas sa round.
Apan sa ika-2:49 minutos sa 2nd round, pampatay nga right straight ni Nietes ang nitugpa na sab sa apapangig ug nagpatumba’g balik ni Castro, ning higayuna nahuman na ang away. Taodtaod pa una nakabangon pagbalik si Castro.
“I think Nietes is very underrated fighter but he’s really good, he’s one of our top fighters. I hope we can give him a fight in the U.S pero we’ll just try because of his weight, di man gud kaayo mahalin didto,” pasabot ni Aldeguer.
Impresibo sab gyud kaayo ang gipakita ni Pagara. Iya dayong gitumba si Kongdej sa sayong bahin sa 1st round pinaagi sa body shots.
Naglisod na pagbangon si Kondej ug nasuwertihan kay naluwas siya sa bagting.
Padayong gikastigo ni Pagara si Kongdej hangtod nga giundang na lang sa referee ang away dihang wala na mobawos og sukmag si Kongdej sa ika-2:20 minutos sa 4th round.
Sa laing mga away, nagtabla sila si ALA boy Joseph Omanz batok Roger Galicia, midaog si ALA boy Weng Haya batok kang Ricky Sismundo unya milampos si Albert Villcampa batok kang JV Tuazon (SD). (ESL)
(Septiyembre 1, 2008 isyu)
Sunod nga sports: RP Youth sud sa quarterfinals
