Lunes, Nobiyembre 3, 2008

Asawa, ‘kabit’ gikiha
Joseph Elvir C. Tubilan Sun.Star Superbalita

LANGYAW nipasakag duha ka mga kasong adultery batok sa iyang asawa ug sa giingong kabit niini nga anak og usa ka huwes sa Sugbo.

Ang relasyon sa iyang asawa ug kabit niini giingong nagbunga og duha ka mga anak.

Apan dihang gibunyagan ang mga bata, ang apelyedo sa langyaw maoy gidala niini apan base sa obserbasyon sa ilang mga silingan ug niya mismo, Pinoy gyud kaayog nawong ang mga bata.

Mga ngan sa mga hingtungdan ning kasoha gipugngan apan nagpuyo sila sa habagatang Sugbo.

Ang langyaw nga bana nitug-an nga ang iyang asawa nisuwat ngadto sa iyang inahan nga nangayo og 1,000 dolyares.

Niangkon siya sa iyang pagpakasala hinungdan nga ang suwat maoy gigamit sa bana nga ebidensya karon sa gisang-at niyang kaso sa Cebu Provincial Prosecutor’s Office niadtong milabayng semana.

Nisaysay siya nga ang iyang asawa nanganak og batang babaye niadtong 1999 ug nasundan niadtong 2002.

Ang anak sa huwes dinhi sa Sugbo maoy iyang gitumbok nga amahan niini apan nagdala sa iyang (langyaw) apelyido ang mga bata.

Iyang gitug-an nga pipila ka tuig ang nakalabay, kanunay siyang hulgaon sa iyang asawa ilabi nang nipahibawo kini nga mabdos siya ug ang amahan niini anak sa huwes.

Kon modangop siya korte, wa gihapon siyay mahimo niini.

Subay niini, nisang-at siyag petisyon sa korte nga himuong imbalido ang ilang kasal niadtong 2003 apan hangtod ning higayona wa pa gyud modagan ang kaso.

Gani, gipasakaan pa siyag attempted parricide sa iyang asawa, gipamaligya ang ilang mga kabtangan nga wa siya gipahibawo, gibilanggo siya sud sa ilang balay, pasakitan siya kon moduol ug nipalit pa gyud kinig bag-ong sakyanan.

Gawas ning iyang pinanumpaang pamahayag, ang ilang anak nisumiter usab og affidavit nga nagdetalye nga ang iyang inahan nalambigit gyud sa laing lalake gawas sa iyang amahan.

Nitumbok siya nga niadtong 2002 dihang ang iyang amahan niadto sa Estados Unidos nakit-an niya nga dunay laing gikadulog ang iyang inahan sa ilang kuwarto.

Nakaila siya sa lalake sa iyang inahan.

Matod niya nga diha pay higayon nga gidala sa lalake ang iyang inahan sa usa ka maternity house sa Tabunok, Talisay City aron paanakon sa ikaduhang bata nga resulta sa ilang panagrelasyon.

Ang bata nitug-an nga kanunay siyang sugsugon sa iyang mga classmate sa ilang tunghaan kabahin sa sitwasyon sa iyang inahan ug sa kanunay niining pagsul-ob og mubo nga shorts.

Niabot ang higayon nga gipalayas siya mismo sa ilang balay hinungdan nga nitipon na siya karon sa iyang giilang amahan.

(Nobiyembre 3, 2008 isyu)

Sunod nga balita: Malinawon bisan kon dunay gitipi