Lunes, Nobiyembre 3, 2008

Malinawon bisan kon dunay gitipi

USA ka kinabuhi ang nakalas samtang usa ang gipusil niadtong adlaw sa mga Santos sa dakbayan sa Sugbo.

Apan matod sa kapulisan nga ang maong mga insidente way kalambigitan sa kasaulogan sa All Saint’s Day ug nahimo gihapong malinawon ang kinatibuk-ang paghandom sa Kalagkalag.

Matod ni Cebu City Police Office (CCPO) director, S/Supt. Patrocinio Comendador Jr. nga way nahitabong “violent incident” sud sa mga sam-ang ug “generally peaceful” ang duha ka adlaw sa mga Santos ug minatay.

Ang pagdunggab-patay kang Luisito Ybañez, 25, sa sityo Kabulakan, barangay Basak-Pardo pasado alas 4 niadtong Sabado sa hapon way kalambigitan sa kasaulogan sa All Saint’s Day.

Giingong nag-inom ang biktima uban sa suspek nga si Jose “Kirkir” Abrasaldo, 32, dihang nagkasumpaki.

Gidunggab sa suspek ang biktima sud sa makadaghang higayon ug gitigbas pa sa agtang ug ulo hinungdan sa dihadiha nga kamatayon.

Nitahan hinuon ang suspek ngadto kang PO2 Junard Chong sa Special Reaction Unit (SRU) sa Cebu Provincial Police Office (CPPO).

Samtang ang pagpamusil kang Julito Bayhonan, 29, sa sityo Oliho, barangay Buhisan, mga alas 8 niadtong Sabado sa gabii wa say koneksyon sa kasaulogan sa kalagkalag.

Giingong igo ra untang mouwang si Bayhonan sa panag-away nila ni Erning Bayhonan ug sa usa ka ginganlan og Allan alyas Nestor dihang kalit nga nibuto ang gihuptang armas sa nauwahi. (CPL)

(Nobiyembre 3, 2008 isyu)

Sunod nga balita: Plete sa traysikol sa Lapu way umento