Lunes, Nobiyembre 3, 2008

Plete sa traysikol sa Lapu way umento

NAUYONAN sa kagamhanan sa dakbayan sa Lapu-Lapu ug mga grupo sa traysikol drayber sa dakbayan nga kasamtangan una nga di una ipatuman ang gipangayo niini nga usbaw sa pletihan.

Gipugngan una ang pagpatuman sa P1 nga umento sa pletihan sa traysikol ilabi na nga adunay sunod-sunod nga pag-rollback sa presyo sa petrolyo.

Kahinumdoman nga niadtong miaging buwan ang konseho niaprobar sa petisyon sa mga traysikol drayber nga mangayo ug P1 nga umento sa minimum nga pletihan gikan sa P7 ngadto na sa P8 sa unang tulo ka kilometro.

Gihulagway ni konsehal Junard Ahong Chan nga ang kasabutan usa ka “intellectual understanding” tali sa grupo sa mga traysikol drayber.

Niuyon si Chan kinsa maoy chairman sa committee on transportation nga nipabor siya sa petisyon nga adunay rollback sa pletihan nga giduso ni Atty. Manuel Iway.

Apan gumikan sa way pagkunhod sa presyo sa mga nag-una nga palitunon bisan sa pagkunhod sa presyo sa gasolina maoy gibasehan sa konseho nga ilang giaprobahan ang petisyon.

Samtang si Lapu-Lapu City Vice Mayor Mario Amores nagkanayon nga ikapatuman lang ang ordinansa sa higayon nga ang pag-usbaw sa presyo sa petrolyo magsunod-sunod sa matag semana. (FVQ)

(Nobiyembre 3, 2008 isyu)

Sunod nga balita: Naghikog tungod sa iyang kaso