Lunes, Nobiyembre 3, 2008

Naghikog tungod sa iyang kaso

NAGPAKAMATAY ang usa ka 58-anyos nga albularyo pinaagi sa paghigot og pisi sa iyang adlaw, sa adlaw mismo sa mga minatay.

Giingong kaso nga gikatakdang isang-at sa korte batok kang Severino Gelbolingo ang gituohang nagtukmod kaniya aron kutluon ang kaugalingong kinabuhi.

Ang iyang anak nga si Silvestre maoy nakadiskubre nga nagbitay na si Severino gawas sa ilang bay sa sityo Katangkungan, barangay Basak dakbayan sa Sugbo pasado alas 12 niadtong Dominggo sa kaadlawon.

Matod ni SPO4 Alex Dacua sa Homicide Section sa Cebu City Police Office (CCPO) nga pipila na usab ka higayon nga nisuway sa pagpakamatay si Severino apan mapakgang lang sa iyang anak.

“Sa miaging mga adlaw magsige na siya og bitbit og kutsilyo kay magpakamatay pero mailog sa anak,” nagkanayon si Dacua.

Giingong naguol si Severino kay dunay kasong kriminal ang ipasaka batok kaniya sa umaabot nga adlaw human wa kini ma-settle sa barangay.

Nagdumili lang hinuon si Dacua sa pagtug-an sa kaso agi og respeto sa namatay.

Gituohang gipaabot lang ni Severino nga makatulog ang iyang anak una niini gihinayon ang tinguhang pagpakamatay.

Na-recover sa kapulisan ang plastik nga lingkuranan nga maoy gitungtongan niini aron maabot ang brace sa ilang atop diin gihigot ang pisi nga gigamit sa paghikog niini. (CPL)

(Nobiyembre 3, 2008 isyu)

Sunod nga balita: Panaygon mas maayong himuong legal