Lunes, Nobiyembre 3, 2008

Panaygon mas maayong himuong legal
Asoy ni Junrey Nadela

ANG atong kadalanan namuwak na sa mga bata nga namasko sa mga sakyanan nga ilang makursonadahan. Talan-awon nga sa dugay nga panahon atong nasaksihan bisan pa man sa paningkamot sa atong awtoridad nga kini mapapas. Way nahimo ang maong paningkamot kay misiaw na man hinuon og maayo ang ilang grupo ug mas midaghan pa hinuon paglabay sa panahon. Ang bag-ong sugyot himuon na lang legal ang gidili nga pagpanaygon.

LEGAL

Mas maayo pa nga itugot na lang sa kabataan o ni bisan kinsa nga manaygon sa karsada kay sa ato silang gukdon. Tingale manuyo ini ang taga City Hall. Apan sa ka dugay na sa panahon ug sa kadaghan na sa Disyembre nga nangagi nga wa gyud silay nahimo pagsumpo, mas maayo pa nga hatagan na lang nato sila sa kahigayonan nga malipay sab ning panahon nga nagkaduol na ang Pasko.

Ang akong sugyot nga ang City Hall magpili og dapit diin mahimong makapamasko sila. Pananglit ang usa ka bahin sa Osmeña boulevard ilhon nga daygon area. Anhi dinhi masaksihan ang nagkadaiyang matang sa pagpanaygon. Sa ato pa idili kini sa ubang karsada,apan itugot sa gitawag nga daygon area. Di ba mas nindot kay kon gusto ka nga magpadaygon o maminaw og paskuhanong awit nga live, moadto ka lang sa maong dapit.

Mahimo sab nga ang daygon area di karsada aron di mabara ang bul-og sa trapiko. Acting Mayor Michael Rama mahimo siguro nga atong sugdan kini diha sa tugkaran sa legislative building.

NOV. 8

Human sa taas taas nga pagpinaabot ipahigayon na gyud karong Sabado ang revival sa Nadela Clan Reunion. Anha ni manukad sa SUGBU sa South Road Properties sa dakbayan sa Sugbo. Dako ang akong pasalamat sa akong mga kauban sa Committee nga akong gipangulohan pag-organize ning maong kalihukan. Mapasalamaton sab ko sa akong mga paryente nga way duha-duha nga misuporta sa katuyoan sa maong reunion. Subo lang sab nga palandungon nga ang uban wa na makaabot sa maong petsa kay mitaliwan na sa laing kalibutan. Samtang ang uban di makatambong tungod sa ka layo sa ilang nahimutangan.

Ako sab pasalamatan ang mga higala sa Nadela nga miunong sab sa preparasyon sama kanila ni Mr. Jack Jabonero sa Asia Brewery, Dr. Felimon Alberca nga mi-volunteer sa medical mission nga usa sa mga highlight sa reunion, si Bobby Moralde, tag-iya sa Hurricane Mobile Disco, Fidel Magno sa DMDP l sa job fair nga atong isal-ot,

Mayor Tomas Osmena nga mihatag og pagtugot nga magamit ang venue karong Sabado, Nagiel Banacia sa SRP Management nga miayuda sa among kinahanglunon didto. Mga agaw manghinaot nga ready na ta para karong Sabado.

(Nobiyembre 3, 2008 isyu)