Lunes, Nobiyembre 3, 2008

Kon ikaw ang pahukmon: Gikamang

KINING mao nga estoriya base sa kaso nga giapelar ngadto sa Supreme Court nga giduso sa akusado ug nahukman na. Gipresentar dinhi ang duha ka mga habig, sa prosekusiyon ug depensa, nga maoy gibasehan sa hukom sa Labing Taas nga Hukmanan. Ikaw nga nagbasa giawhag sa pagpadangat sa imong panahom sa kaso, kon ikaw ang pahukmon niini. Sa imong tubag, pinaagi ba sa mail o e-mail, ibutang ang imong kompletong ngan ug address.

Ayaw paggamit og codename kay ma-disqualify ang imong entry. Kon mogamit ka man og codename aron mao lay ipatik, ilakip ang imong kompletong ngan ug address.

Among ipatik ang inyong mga tubag uban sa inyong mga ngan. Ang imong tampo ipadangat lang sa Kon Ikaw ang Pahukmon, Sun.Star Superbalita, P. Del Rosario St. Cebu City. Mahimo sab kini i-e-mail sa rrm@sunstar.com.ph o kulas@sunstar.com.ph. Kadtong tubag nga sakto ug maayong pagkahan-ay, dunay madawat nga cash isip ganti. Pagdala lang kamo og ID sa inyong pag-claim sa premyo atol sa oras tingtrabaho, gikan sa alas 9am-5pm, Lunes ngadto sa Biyernes.-EDITOR

GIKAN sa Hulyo 2002 ngadto sa Agusto 2002, sila si Ponyong, iyang asawa, iyang anak nga si Layla ug lima niya ka mga manghod, didto mopuyo sa balay sa iyang uyoan ug iyaan kay gihangyo silang maoy moatiman niini. Ang iyang uyoan ug iyaan ni Layla dunay giatiman sa laing dapit.

Usa niana ka higayon nianang Agusto, alas 7 sa gabii, sila si Ponyong ug ang iyang asawa diha mangatug sa sala. Sila si Layla ug ang iyang tulo ka mga manghod, nangatug sa usa ka kuwarto.

Mga tungang gabii na dihang nahigmata siya kay gikuptan ni Ponyong ang iyang tiil. Nikamang si Ponyong kaniya ug gikabay-an siya samtang gikuptan ang iyang mga kamot. Gihukasan siya gamit ang usa lang ka kamot niini.

Bisan sa iyang pagpanglimbasog ug pagpakiluoy, ingon sa nabungol ang iyang amahan sa yawan-ong tinguha niini. Giangkon gyud sa akusado ang iyang pagkababaye.

Wa siya makasinggit kay gisampungan sa iyang amahan ang iyang baba. Pagkahuman, isog kining nipahimangno kaniya nga di maglangas sa hitabo.

Nianang Pebrero sa 2003, nibisita sa ilang balay ang principal ug adviser ug nipahibawo sa ni Layla nga mabdos ang iyang anak. Ilang gidala si Layla sa ospital ug didto nasayran nga mabdos kini.

Gisukitsukit siya kon kinsa ang nagbuhat niini apan, nidumili gyud siya sa pagtug-an. Human masayod ang amahan nga mabdos ang iyang anak, nahanaw kini. Nianang Mayo 4, 2003, nanganak ang si Layla. Pagkahuman, didto na siya motug-an nga ang iyang amahan maoy amahan sa iyang gihimugsong bata.

Si Ponyong nangitag lusot. Matod niya nga niadtong mga buwan sa Hulyo ug Agusto, didto ra siya sa ilang balay kay nag-atiman sa ilang kamaisan ug kahayupan. Maadlaw ra siya moduaw sa iyang pamilya ug nianang hapon mopauli aron moatiman sa kahayupan.

Kanunay silang mag-away sa iyang asawa parte sa kuwarta mao nga nilayas siya sa ilang balay. Wa gyud siya masayod nga ang iyang anak mabdos. Wa sab siya masayod nganong pasanginlan siya sa iyang anak.

Huyang ba ang alibay ni Ponyong? Sad-an ba siya, kana kon ikaw ang pahukmon?

(Nobiyembre 3, 2008 isyu)