 |
Dominggo, Nobiyembre 2, 2008 |
Barrita: Numero uno
Eddie O. Barrita
Tikdul-Tikdol
MORAG di na gyud malupigan ang dakbayan sa Sugbo.
Nahimo kining numero uno isip emerging global destination sa information and communication technology (ICT).
Karon numero uno na sab ang syudad sa Sugbo sa labing dakog utang.
Mao kanay syudad nga second to none.
****
Pero nipasalig man si Cebu City Mayor Tommy Osmeña nga mapapas ang utang sa dakbayan kon mahalin na ang South Road Properties (SRP).
Ang SRP mao ang kaugmaon sa dakbayan sa Sugbo.
Ato na lang ibaligya ang atong kaugmaon.
****
Gitawag na sab ni Mayor Osmeña nga queen of darkness si Cebu Gov. Gwen Garcia as “queen of darkness” tungod sa ngiob ug ngitngit nga kalungsoran ug barangayan sa lalawigan sa Sugbo.
Angay tingali una nga mopahuway si Mayor Osmeña sa mga atake sa iyang mga kontra samtang nagpatambal pa siya sa iyang balatian nga cancer sa pantog.
Pero nakaalinggat kon nga gitapakan na ang ubang nga libaong sa sa kadalanan sa dakbayan samtang wa pa tawga sa Kapitolyo si Mayor Osmeña nga “king of potholes.”
****
Nagdumili si Gov. Gwen Garcia sa pakigtrokis kang Mayor Osmena hangtod nga maayo ang halangdong mayor sa iyang balatian. Gani, nag-ampo pa siya sa dali nga kaayohan sa mayor.
Pahuway usa sa rinakrakay.
Asa ra man na kon maayo na si Mayor Osmena.
****
Maagian na sa mga sakyanan ang flyover ni Rep. Raul del Mar (Cebu City, north district) didto sa Banilad-Talamban area.
Sumala sa mga taho, niluag ang trapiko sa maong dapit bisan atol sa Kalag-Kalag nga panahon unta nga magtampunsisok ang mga sakyanan.
Namunga na ang sakripisyo sa katawhan.
****
Duha ka mga maghuhukom sa Cebu City Regional Trial Court (RTC), sila si Judge Men-Men Paredes ug Gabby Ingles, nagdumili sa pagdawat sa allowances nga gihatag sa Kapitolyo ug City Hall bisan pa kon wa pending nga kaso sa ilang sala ang Kapitolyo ug ang City Hall.
Di man tingali makaapekto sa judicial independence ang pagdawat nilag allowance gikan sa Kapitolyo ug City Hall kay salapi man kini sa katawhan.
Ang nakaparat lang mao nga kon di gani makauyon ang Kapitolyo ug ang City Hall sa hukom sa mga huwes, manghulga man dayon nga tangtangon ang maong mga allowance.
****
Gikatahong malinawon ang atong pagsaulog sa Kalag-Kalag dinhi sa Sugbo.
Maayo kining maong kalamboan kay kadtong magbinuang, mausab na unyang ang ilang birthday sa adlaw sa minatay.
Duna say taho nga nag-ingon nga daghan na karon ang nidangop sa cremation tungod sa kamahal sa lungon ug sa lugar nga kalubngan.
Nationuod na gyud ang ginaingon nga all are creamted equal.
(Nobiyembre 3, 2008 isyu)
