Dominggo, Nobiyembre 2, 2008

Bañoc: Sayo ra kaayo tang misilibrar
Ruphil Bañoc
Birada

DAGHAN ang nagdahom nga sa iyang pagtungtong pagbalik sa iyang yutang natawhan, moderitso na sa senado si Jocjoc Bolante, ang utok sa misteryusong pagkahanaw sa 728 ka milyon nga fertlizer fund.

Base sa resulta sa imbestigasyon, didto nahug sa kampanya ni GMA sa 2004 ang maong salapi imbes kapahimuslan sa mga mag-uuma. Ang pipila ka mga kongresista ang nabulahan ug mga local government officials sa daghang lugar. Sakto si Juan sa iyang bagulbol, “Ingon way kuwarta ang gobyerno mao nga kinahanglang magdaginot, maong way usbaw sa suholan sa mga trabahante, maong way libro ang mga tunghaan, apan ngano kung mangawat si GMA ug ang iyang mga hinanib binilyon man.”Mobalik ta kang Jocjoc didto sa airport. Andam na unta ang sergeant at arms sa senado pagda kang Jocjoc, ug kung duna siya gibati sa lawas andam na usab ang mga doktor sa senado.

Apan di van sa senado ang nikuha ni Jocjoc aron dad-on siya ospital. Igo na lang nakapanglingolingo ang tibuok nasod.

“Naisahan”. Tuaw sa atong mga gagmayng kaigsuonan:” Kung ang kabus ug way impluwensya ang dakpon, paspas pas alas tres nga siya madakop ug usahay daklon pa. Kung gamhanan ang dakpon, mohikap lang sa dughan nga nihuot kunuhay, i-agi sa doktor.

” Way gikatabang ang pag-antras abante ni Senate President Senator Manny Villar aron kasugdan dayon ang imbestigasyon. Hilabihan kahubog sa iyang ambisyon nga mahimong presidente sa Pilipinas, giihap pag-ayo ni Villar ang iyang mga lakang o di ba kaha nga hilom na siyang best friend ni GMA. Lugak ang iyang liderato.

Sa iyang sinuwat nga arrival statement gisaad ni Bolante nga isulti niya ang tanan apan  diha siyay gipakapin: mosulti lang siya sa proper forum. Klarong sinuwat sa Malacañan.

Proper forum. Mao kini ang siyagit niadtong di buot nga atubangon ni GMA ang proseso impeachment. Apan ang usa ka impeachment court usa usab ka proper korum. Maayo gyud natong pagkalipat.

Hinaot mapatud-an nga sayop ko, apan alang kanako — base sa daghan sa panghitabo — matag adlaw nagtikadom ang posibilidad nga motug-an si Jocjoc sa tanan gayud. Tingali ang katunga sa kamatuoran! Half-truth is a lie.

Usahon na lang nato og pagpanukot ang tanan inig-abot sa 2010 ug siguraduhon nga di itoy ni GMA ang modaug — sama ni Noli nga nagpakahilom taliwa sa naghitak nga kurapsyon sa administrasyon. Ug ngadto kang Villar ako moingon: Senator, kahadloki ang paghukom sa kasaysayan.

(Nobiyembre 3, 2008 isyu)