 |
Lunes, Nobiyembre 3, 2008 |
Donaire milampos
SA ikaduhang higayon, nadepensaan ni Nonito “The Filipino Flash” Donaire ang iyang duha ka world titles pinaagi sa 6th round TKO nga kadaugan batok kang South African Moruti Mthalane kagahapon sa Mandale Bay Resort and Casino sa Las Vegas, USA.
Nagisian ang ibabawng bahin sa walang mata ni Mthalane dihang naigo sa right straight ni Donaire sa 6th round apan wa dayon makit-i sa beteranong referee nga si Joe Cortez ang gisi ni Mthalane.
Pinaagi sa sinyas ni Donaire, hayan nabantayan na gyud ni Cortez ang gisi ni Mthalane ug iya kining gipatan-aw sa ring physician.
Human masusi, nimando ang ring physician kang Cortez nga ipaundang ang away. Ang oras kay 1:31 minutos.
“I hit him with a right straight, and I saw he got cut big,” matod pa ni Donaire, kinsa nakadepensa sa iyang International Boxing Federation ug International Boxing Organization flyweight titles.
Si Donaire, kinsa nagsul-ot og Arthro headband sa wa pa nagsugod ug pagkahuman sa away, nag-una gyud sa tulo ka judges dihang nahunong ang kombati. Ang Arthro maoy food supplement nga gi-endorso ni Donaire.
Sa interbyu sa www.philboxing.com, gipasabot ni Donaire nga kinahanglang mousab siya’g estilo gikan sa pagkatuohan ngadto sa pagkawalhon gumikan kay naangol ang iyang wala nga tudlo.
“I needed to switch to southpaw, as I injured a left finger in the 2nd round. The switch was very useful,” batbat ni Donaire.
Gani dihang gitantang ang iyang gloves human sa away, nitiyabaw si Donaire sa kasakit tungod sa iyang angol.
Si Donaire misaka sa 20-1, 13KOs nga baraha samtang si Mthalane, kinsa nikuwestiyon kon nganong giundang ang away, nahagsa sa 22-2, 15KOs.
Sa main event, giusban pagpukan ni Julio Cesar Chavez Jr. (38-0-1, 29KOs) si Matt Vanda (39-8-2, 22 KOs) apan ning higayuna, wala na’y nagduda sa iyang kadaugan.
Sa premiro nilang away niadto lang Hulyo, midaog si Chavez pinaagi sa kontrobersyal kaayo nga split decision.
Sa laing away si undercard, niposte’g 4th round TKO nga kadaugan si World Boxing Council (WBC) interim super flyweight champion Jorge Arce (51-4-1, 38 KOs) batok kang Isidro Garcia (25-6-2, 8 KOs). (ESL)
(Nobiyembre 3, 2008 isyu)
Sunod nga sports: Darchinyan mi-knockout ni Mijares; gustong makig-rematch ni Donaire
