 |
Lunes, Nobiyembre 3, 2008 |
Darchinyan mi-knockout ni Mijares; gustong makig-rematch ni Donaire
NATUMAN gyud ang bahad ni Armenian Vic “Raging Bull” Darchinyan dihang iyang gipaundang si Mexican Christian Mijares sa 9th round aron usahon paghipos ang World Boxing Council (WBC), International Boxing Federation (IBF) ug World Boxing Association (WBA) super flyweight titles kagahapon sa Carson, California.
Sa sayo pa, pipila lang ang mituo kang Darchinyan nga iyang kastiguhon og maayo si Mijares una kini niya paundangon sa ulahing rounds.
Apan sa 1st round pa lang, daghan na kaayong ningkaging dihang gitumba ni Darchinyan ang mas inilog nga si Mijares pinaagi sa makusog nga walang kumo.
Unya gamit ang iyang bakikaw apan epektibo nga estilo, padayong gikulata ni Darchinyan si Mijares.
Hinuon adunay higayon nga moaksyon pagbawi si Mijares hilabi na sa 5th round apan tatawng apektado na gyud siya sa iyang pagkahagsa sa 1st round.
Sa 9th round, gikulata na sab og insakto ni Darchinyan si Mijares hangtod nga nabaragbarag unya nasandig sa pisi si Mirajes dihang naigo sa left-right nga kombinasyon ni Mijares.
Niadtong aktuha, giundang na sa referee ang away insakto 3:00 minutos ang nakaon sa round.
Si Darchinyan naggunit na karon og 31-1-1, 25KOs nga baraha samtang si Mijares nahagsa sa 36-4-2, 15KOs.
Human sa away, mibahad si Darchinyan nga iyang panimaslan ang bugtong nakapildi kaniya nga si IBF/IBF flyweight champion Nonito “The Filipino Flash” Donaire.
Si Donaire niposte sab og kadaugan kagahapon sa ikaduha niyang depensa sa Las Vegas (Mabasa sa laing estorya).
“I will destroy Donaire, even easier than I beat Mijares,” bahad ni Darchinyan sa interbyu sa www.secondsout.com.
“Everyone put too much into my loss to Donaire. I don’t make excuses but I was not focused for that fight. I was very focused for this fight.” (ESL)
(Nobiyembre 3, 2008 isyu)
Sunod nga sports: Partner's Cup sa Cesafi gipangandaman
