Biyernes, Nobiyembre 21, 2008

Station 'gibiyaan' sa pulis

TANANG mga pulis sa lungsod sa San Francisco, isla sa Camotes gipailawom karon sa imbestigasyon.

Kini human nga way bisan usa ka pulis sa police station nga nitubag dihang gitawgan sa usa ka opisyal sa Cebu Provincial Police Office (CPPO) niadtong Nobiyembre 12.

Gani ang nitubag na lang sa telepuno mao ang usa sa ilang mga piniriso.

Nahitabo kini sa miaging semana diin mismo ang luyoluyong pangulo sa CPPO nga si Supt. Erson Digal nanawag sa police station ug nasuta nga ang nitubag usa sa ilang mga piniriso.

Apan, ang hepe nga si Senior Insp. Ciriaco Larrobis niingon nga di piniriso ang nitubag sa telepono kon di ang ilang civilian driver.

Hinuon iyang giangkon nga wa gyoy mga pulis niadtong higayona tungod kay kadtong mo-off nanguli na bisan kon wa pa moabot ang mga pulis nga mo-duty.

Ang kadtong nag-duty nadugay usab pag-abot.

Matod ni Larrobis nga atol sa maong hitabo ania siya dinhi sa Sugbo tungod kay ang ilang dinakpan gipasakaan og kaso.

Base sa iyang pasiunang imbestigasyon ang iyang mga pulis pulos adunay tagsa-tagsa ka mga rason.

Gumikan niini silang tanang mga pulis lakip na kaniya gipailawom sa imbestigasyon.

Nasayran nga diha untay usa ka pulis nga wa mopauli apan giingon nga naglain usab ang tiyan ug nitubag sa sugo sa lawas.

(Nobiyembre 21, 2008 isyu)

Sunod nga balita: Pasidungog sa pulis nga nakapatay