Biyernes, Nobiyembre 21, 2008

Pasidungog sa pulis nga nakapatay

MGA opisyal sa kapulisan mohatag og pasidungog sa pulis nga nakapusil patay sa usa ka gidudahang esnatser didto sa lungsod sa Minglanilla niadtong Miyerkules sa hapon.

Si CPPO Director Carmelo Valmoria moduso alang sa promotion samtang si Talisay City police chief Sr. Insp. Jovito Canlapan mopasidungog kang SPO2 Frederick Larrobis sa pagpusil patay kang Marino Gabuya, 27, taga brgy. Bulacao, Cebu city.

Si Gabuya napusilan patay ni Larrobis human molabni sa bulawang kuwentas ni Andre Martin Rockie Buanjog, taga Lipata, Minglanilla, Cebu samtang nagsakay og multicab.

Si Larrobis niingon nga bisan nipaila siya nga pulis, nilanit sa iyang pusil si Gabuya ug nipunting kaniya apan maayo na lang nga wa kini makabuto.

“Nagpaila ko, iya na man hinuon kong giatake,” saysay ni Larrobis sa interbyu sa GMA-7 Balitang Bisdak.

Mao kini ang hinungdan nga nilanit siya sa iyang 9MM pistol ug gibaslan si Gabuya.

Gikan si Larrobis sa interbyu sa Police Regional Office (PRO-7) alang sa usa ka interbyu alang sa promotion dihang dunay grupong nisulti kaniya nga dunay giesnatsan.

Si Canlapan nibutyag nga mohimo siya og report sa bayanihong buhat ni Larrobis ngadto sa Cebu Provincial Police Office (CPPO).

Matod niya nga makatarunganon lang nga pasidunggan si Larrobis nga nitubag sa alarma bisan off duty.

Si Larrobis nitataw nga obligasyon gyud nila nga mga pulis ang pagtubag sa bisan unsa nga alarma.

Nasayran ni Larrobis nga ang suspek usa diay ka ex-convict ug bag-ohay lang nga nakagawas gikan sa Bagong Buhay Rehabilitation Center (BBRC). (VLM)

(Nobiyembre 21, 2008 isyu)

Sunod nga balita: MV Cassandra: 25 ka tuig nga paghinumdom sa pait tam-is