Biyernes, Nobiyembre 21, 2008

Sugilanon: Panimalos nga wa malahos
Lucia H. Nuñeza
C/o DepEd, Tabogon, Cebu

MORAG inihap ang mga lakang ni Lando dihang misulod siya sa lagwerta sa banay nga Trilon. Giampingan gayud niya ang iyang mga lihok aron di siya makamugna og bisan gamay na lang nga kasikas, nga mao unya hinuon ang hinungdan nga adunay makamatikod kaniya nga nisulod sa maong lagwerta.

Kinahanglan gayud niyang magmatngon. Delikado man god kining iyang gihimo; nahisupak kini sa balaod. Kalapasan man god sa atong balaod ang pagsulod sa lagwerta sa laing tawo nga walay pagtugot sa tag-iya.

Ug labaw pang usa ka kalapasan sa atong balaod kining iyang pagahimuon karong gabhiona. Nasayod siya nga kon pananglit mabulilyaso kining iyang misyon, sigurado gayud nga bilanggoan maoy iyang padulngan.

Samtang didto na si Lando sa sud sa lagwerta sa banay nga Trilon, nangita dayon siya og maayong puwesto nga sarang niyang mahup-an. Gipili gayud niya ang usa ka dapit nga mabantaaw kaayo sa iyang panan-aw ang lawak sa tiguwang nga Trilon. Si Mauricio Trilon, ang tawo nga iyang gikasilagan pag-ayo.

Didto siya mopahimutang sa usa ka dakong punoan sa mangga sud sa maong lagwerta. Maayo kining dapita kay duol ra sa lawak sa tiguwang nga Trilon. Maklaro kaayo niya kon kinsay anaa sa lawak tungod kay ginama man sa bildo ang bintana niini.

Samtang nagpaabot si Lando nga mosulod na ang tiguwang Trilon sa iyang lawak, nagpunay siya og hinol sa kalibre 38 nga gisuksok niya sa iyang hawakan. Puno sa mga buhing bala ang armas.

Unya inanay nga namalik sa iyang panumdoman kadtong nahitabo tali kaniya ug sa banay nga Trilon nga maoy hinungdan sa pagkahimugso sa iyang gilaraw nga panimalos.

Buhi pa kaayo sa panumdoman ni Lando kadtong higayon nga gibali-bali siyag sagpa sa amahan sa mayor nga si Mauricio Trilon. Diha gayud kini nahitabo atubangan sa munisipyo sa ilang lungsod. Nakasaksi pa gani sa maong hitabo ang hepe sa kapulisan. Apan wa gyud kiniy nahimo, bisan na lang gani unta sa pagbadlong sa tiguwang Trilon sa gibuhat niini ngadto kang Lando. Nahadlok sab ang hepe, ilabi na kay gamhanan kaayo ang mga Trilon sa ilang dapit.

Wa kaayo unta sakiti si Lando sa mga sagpa nga iyang nadawat niadtong tungora. Ang iyang gikasakitan kaayo kay wa man god siyay sala. Igo man lang siya nga niagi sa nahimutangan sa tiguwang nga Trilon nga uban sa mga bata-bata sa mayor. Diha man god sila nagtapok sa atubangan sa munisipyo.

Hinuon nasayod si Lando nga naglagot gayud kaayo kaniya ang amahan sa mayor. Usa man siya sa mga lider sa kandidato nga niatbang sa mayor sa niaging eleksiyon. Aktibo kaayo siya sa tanang pangampanya ug hapit gani makadaog ang kandidatong iyang gipaluyohan.

Kon di pa lang tungod sa tikas ug pagpanghasi sa mga goon sa mga Trilon, tingali napildi gayud ang anak ni Mauricio Trilon. Gamay ra kaayo labaw niini sa iyang kontra.

KALIT lang nga naputol ang paghanduraw ni Lando sa iyang kagahapon dihang nasigpatan niya nga misiga na ang sugang dagitabnon sud sa lawak sa tiguwang Trilon. Unya misihag lahos sa bildo nga bintana ang anino sa usa ka tawo. Nasiguro ni Lando nga kang Mauricio Trilon ang maong anino kay pamilyar na man kaayo niya ang bayhon niini.

Giandam dayon ni Lando ang iyang kaugalingon. Giibot niya ang rebolber gikan sa iyang hawak. Gipunting kini tumong sa lawak diin nakita niya ang anino. Unya gipuntariya niya ang armas ngadto sa anino ni Mauricio.

Apan sa dihang kabliton na unta niya ang gato sa iyang armas, kalit lang may laing duha ka anino nga iyang nakita nga misulod sa lawak. Tulo na ka mga anino ang iyang nakita.

Unya nakabati siya og mga buto nga nagagikan sa maong kuwarto. Upat gyud ka sagunson nga mga buto ang iyang nadungog. Ug sa paminaw niya morag nagkalangas didto sa sud sa kuwarto.

Tungod sa wa damhang panghitabo midali pagbiya si Lando gikan sa iyang nahimutangan. Misuot siya sa kangitngit ug mipahilayo sa maong dapit. Ning higayuna lagsik na kaayo ang iyang mga lakang.

Nianang pagkabuntag naukay ang tibuok katawhan sa lungsod tungod sa usa ka balita mahitungod sa usa ka duguong hitabo sa nilabay nga gaii. Mikatap ang balita nga si Mauricio Trilon gitulis ug unya gipatay sa wa hiilhing mga tulisan. (KATAPUSAN)

(Nobiyembre 21, 2008 isyu)