 |
Biyernes, Nobiyembre 21, 2008 |
Editorial: Kalambuan gibabagan
PASPAS ang mga kalambuan sa mga bag-ong dakbayan dinhi sa Sugbo nga mao ang Naga, Carcar ug Bogo.
Madasigon ang mga mayor nga nangulo sa pagmugna ug pagpakanaog sa lain-laing mga proyekto alang sa kalambuan sa ilang mga dapit ug kaayuhan sa mga lungsoranon.
Mao nga sama sa bugnaw tubig nga gibubo sa baga ang epekto sa desisyon sa Korte Suprema nga nagbalewala na sa mga balaod nga nagdeklarar nga dakbayan kining tulo ka mga dapit.
Matod pa ni Sen. Aquilino Pimentel, sakto kining desisyon kay nagpatigbabaw sa rule of law.
Sayop man kuno ang gimugnang mga balaod nga nagdeklarar nga kining tulo mga syudad.
Ang ato lang pangutana mao: unsa man kining balaura nga imbes mopalambo sa Naga, Carcar ug Bogo, nibabag man hinuon sa kalambuan niini?
Di ba kini hinuon ang angayang usbon?
Dugang pa, ang desisyon sa Korte Suprema nibabag sa tinguha sa libuang mga lungsoranon sa tulo ka mga lungsod.
Kinsa may nakabenepisyo niini?
Tataw nga ang nangusog sa maong pagbabag mao ang mga syudad nga nagsalig lang gyud sa IRA ug wa na maghunahuna og mga kalambuan alang sa ilang mga dapit.
Klarong nibabag kini sa kalambuan.
(Nobiyembre 21, 2008 isyu)
