 |
Biyernes, Nobiyembre 21, 2008 |
Cavaliers gipakgang
HUMAN nila patagamtama sa unang kapildihan ang Los Angeles Lakers, gipakgang na usab sa Detroit Pistons ang walo ka sunodsunod nga kadaugan sa Cleveland Cavaliers kagahapon pinaagi sa pagkulit og 96-89 sa nagpadayon nga season sa NBA.
Ang bag-ong Piston nga si Allen Iverson kinsa mitali og 23 puntos, maoy nangulo sa dakong rally sa Detroit sa fourth quarter nga nagselyo sa kadaugan diin sa samang higayon naghatag kanila og puwesto sa ikaduhang luna sa Central Division sunod sa Cavaliers.
Kon unsa man ang nahimo sa Pistons mao usab kini ang gibuhat sa Denver Nuggets nga yano ra usab nga mipakaging sa San Antonio Spurs, 91-81.
Ang kanhi Piston nga si Chauncey Billups kinsa maoy gi-trade ni Allen Iverson, mao usab ang nangulo sa Denver nga may 22 puntos.
Midugang si Carmelo Anthony og 21 alang sa Nuggets kinsa aduna nay 7-1 nga record sukad naabot kanila si Billups.
Sa kadaugan, ang Denver pabilin nga nakigsawo sa liderato sa Northwest Division ug miputol sa tulo ka sunodsunod nga kadaugan sa Spurs.
Gipakuratsa usab sa Utah Jazz ang Milwaukee Bucks, 105-94. Ang Jazz pabilin nga wa pay pildi sa ilang korte ug padayon ang ilang dominasyon batok sa Milwaukee kinsa ila nang gibuntog sa walo ka duwa.
Ang Raptors mipabugnaw sa Miami Heat, 101-95, samtang giputlan og sungay sa Portland Trailblazers ang Chicago Bulls, 116-74.
Gipatugdong sa Dallas Mavericks ang Houston Rockets, 96-86. Si Jason Terry mipaksi og 31 puntos ug midugang usab og 24 puntos si Dirk Nowitzki.
Gidominar sa Kings ang Hornets, 105-96; gidagit sa Atlanta Hawks ang Washington Wizards, 91-87.
Gikitkit sa Timberwolves ang 76ers, 102-96, ug gilubong sa Clippers ang Thunder, 108-88.
(Nobiyembre 21, 2008 isyu)
Sunod nga sports: Pacman mora’g makina sa training
