Miyerkules, Mayo 21, 2008

Mati gibutang sa full alert status

GIBUTANG karon sa full alert status ang buhatan sa kapulisan sa siyudad sa Mati isip pagpangandam tingali'g sila ang sunod nga sulongon sa mga rebeldeng New People's Army (NPA) human nila giatake og gidis-armahan ang mga guwardiya sa Davao Oriental Provincial Jail sa maong siyudad niadtong Lunes sa hapon.

Si Police Senior Inspector Candido O. Suralta Jr., hepe sa Mati City Police Office, nagkanayon nga andam kanunay ang "reaction team" sa iyang buhatan kon ugaling magbinuang og paregla ang mga rebelde.

"Puno pirme akong estasyon kay naka-full alert level ko pero ang entire Davao Oriental is back to normal, way angay kabalak-an kay under control na," sumala ni Suralta dihang gihinabi sa SuperBalita.

Si Suralta nagklaro nga daan na silang nakadawat og impormasyon bahin sa pag-atake sa mga komunista.

Apan giklaro sa hepe nga wa sab siya magkuwang sa pagpakatag sa maong impormasyon ug bisan ang provincial jail napahibawo niini.

"Last November pa, we received informations that PNP camps to include provincial jail were subject sa gitawag og `Agaw Armas' sa NPA," matud ni Suralta.

"Prior to the incident, they (provincial jail) were verily informed, gi-recommend pa gani to put up a detachment atbang gyud sa provincial jail," dugang ni Suralta.

Gani, sumala sa hepe, nga human nakadawat sa taho sa planong pagpanghasi sa mga NPA, ang Mati City Jail nga direktang ubos sa iyang pagdumala mibiya gilayon sa Mati ug namalhin sa Lupon niadtong miaging bulan.

Kapin kun kuwang 60 ka mga armado ubos ni Kumander Benjie sa Front Committee 18 miatake sa provincial jain mga ala una sa hapon niadtong Lunes ug gipangtionan ang mga guwardiya, gipang-ilogan sa ilang mga armas ug gipanguha ang mga hinagiban sud sa armory.

Sumala ni Suralta nga 14 ka mga tag-as ug mugbo nga armas ang nasakmit sa mga rebelde ug radio base.

Way pinusilay nga nahitabo ug giklaro ni Suralta nga way gihimong bihag ang mga NPA. (RCO)

(Mayo 21, 2008 isyu)