Miyerkules, Mayo 21, 2008

1 truck sa NPA gikan sa ComVal

USA sa tulo ka mga trak nga gisakyan sa mokabat 60 ka mga rebelde nga misung sa Davao Oriental Provincial Jail sa dakbayan sa Mati giingong naggikan sa Compostela Valley Province.

Si Police Senior Inspector Candido O. Suralta, hepe sa Mati City Police Office, nagkanayon nga sa ilang gihimong imbestigasyon, usa sa mga gisakyan sa mga armado Fuso truck nga may plate number GRY 342.

"As per LTO (Land Transportation Office) record, this is owned by a certain Benjamin Abian of Maragusan, Comval Provincce," pung ni Suralta sa SuperBalita.

Ang lain pang usa, dugang ni Suralta, usa ka puti nga Forward nga may plaka LFN 846. Giklaro ni Suralta nga tungod kay hanap na, naglibog ang nakakita kon 846 o 840 ba ang numero.

"Pag-trace namo, kining 846 naka-plaka ni sa isa ka Adventure from Polomolok, kining 840 sad, naka-plaka sa isa ka sakyanan from Island Garden City of Samal," ni Suralta pa, kinsa midugang nga mihimo pa sila og hugtanong pakisusi aron makakuha og giya sa imbestigasyon.

"As of now, wala pa'y progress report as to the whereabouts of the vehicles used by the NPA," dugang niya.

Hangtud kagahapon, nagpadayon ang hot pursuit operations sa mga otoridad batok sa grupo ni Kumander Benjie sa Front Committee sa NPA nga gitudlong responsable sa pagsulong ug pagdis-arma sa mga guwardiya sa provincial jail. (RCO)

(Mayo 21, 2008 isyu)