Miyerkules, Mayo 21, 2008

Kagawad gidagit sa NPA, gipatay

USA ka barangay kagawad gidagit sa New People's Army (NPA) ug gipatay didto sa Magpet, North Cotabato.

Ang kapulisan nag-ila sa biktima nga si Nelson Latimban, 43 anyos, minyo ug nagpuyo sa Barangay Noa, Magpet.

Base sa taho gikan sa Cotabato Police Provincial Office nasayran nga banda alas 5:00 sa kahapunon niadtong Dominggo samtang naglakaw ang biktima gikan sa iyang uma, gisugat siya sa grupo ni Kumander Dayo sa Front Committee 53 sa NPA ug pinugos nga gidala ang biktima sa kampo sa mga rebelde.

Alas 7:00 sa kabuntagon, Mayo 19, nakit-an na lang ang iyang patay nga lawas nga tadtad sa bala nga gilabay kilid sa sapa sa maong dapit.

Gipamahayag ni Magpet Mayor Efren Pi¤ol nga posibling gipatay ang biktima gumikan sa suporta niini ngadto sa militar ug kapulisan batok sa komunistang grupo nga labad sa ulo sa katawhan.

Nagpakatag na og ubay-ubay nga puwersa sa kasundalohan si 39th Infantry Battalion Philippine Army Commanding Officer Major Lyndon Paniza sa barangay Noa aron ka-proteksyunan ang mga sibilyan batok sa hulga sa mga armado.

Nag-imbestiga na usab ang kapulisan aron mailhan ug madakpan ang mga suspek nga miptay sa naasoy nga barangay opisyal. (Edgardo Fuerzas)

(Mayo 21, 2008 isyu)