Miyerkules, Mayo 21, 2008

16 anyos lalaki nakit-ang patay

GIIMBISTIGAHAN karon sa kapulisan sa lungsod sa Hagonoy, Davao del Sur ang motibo kun nganong gipatay ang usa ka 16 anyos nga nakit-an sa usa ka plantasyon sa sagingan niadtong Lunes.

Sa dihang gihiling sa mga pulis, nakita ang tulo ka mga samad pinusilan sa likod sa biktimang si Danny Banhaw, molupyo sa Camucaan, Aplaya sa nasangpit nga lugar.

Nagtuo si SPO1 Gil Arobo nga kapin duha ka adlaw na nga gipatay ang biktima tungod kay nadugta ug nanimaho na sa dihang napalgan siya.

Nasayrang di na pasudlan sa mga sibilyan ang maong sagingan tungod sa gihimong halapad nga imbestigasyon sa kapulisan aron masayran ang tinuod nga hitabo.

Mga guwardiya sa maong plantasyon gipailawom sab sa kagahapon sa makuting imbestigasyon.

Samtang gibutyag sa amahan sa biktima nga si Virginio nga duol sa sagingan magkabo og tubig ang iyang anak ug bisan sila wa nasayod nganong gipusil.

Lima ka metros gikan sa nahimutangan sa patay'ng lawas sa biktima nadiskobrihan ang mga basiyo sa armas de dose nga maoy gituhoang gigamit pagpusil kaniya.

Nag-unang motibo nga gilantaw sa kapulisan mao kawat apan buot sa pamilya nga patubagon ang mga suspek sa galastuson sa haya ug pagpalubong sa biktima.

"Dili pa nato ma-speculate kon unsa gyud ang actual nga nahitabo because we are still conducting investigation," panapos nga pahayag ni ni Arobo. (Dondon Dinoy)

(Mayo 21, 2008 isyu)