Miyerkules, Mayo 21, 2008

Roldan: Celso Pojas, 46
Ni Emmanuel C. Roldan / Nota Bene

MORA'G dili makatuo sila ni Nong Felix ug Nang Estrella, mga tigulang nga ginikanan ni Celso nga mao kini iyang dangatan sa pagtabang sa mga kabus nga mag-uuma. Kon wala ako masayop, ang mga Pojas nanimuyo kanhi sa Laac, Davao del Norte ug tungod sa kagubot, nanglalin ug nahiabot sa Purok Fatima, Barangay Mandug.

Si Celso maoy pinakamagulangan sa lima ka anak ug nahimong pangulo sa Fatima Farmers Association pagkahuman sa termino sa iyang manghod nga si Josing nga karon adviser sa kasamtangang Punong Barangay sa Mandug.

Tungod sa iyang talagsaong kaaktibo sa pag-organisa ug sa pagprotekta sa katungod sa mga mag-uuna, napili siya isip chairman sa Farmer's Association of Davao City (FADC).

Sa niaging tuig, gitudlo usab siya nga spokesperson sa Kilusang Magbubukid ng Pilipinas (KMP) sa dihang gibalhin ang ilang chairman nga si Tonying Flores ngadto sa kaulohan. Gipusil-patay si Celso sa sayong buntag niadtong Mayo 15 didto mismo sa atubangan sa ilang buhatan sa Bugak, Maa. Gisulti sa iyang mga kauban nga niguwa si Celso aron mopalit og sigarilyo sa tindahan sa ilang atubangan.

Upat ka buto ang nilanog niadtong buntaga gikan sa duha ka tawo nga nagamotor nga maoy nagkutlo sa hinulaman niyang linghod nga kinabuhi.

Dili sila makatuo nga ingon na diay ka seryoso ang bahad sa iyang kinabuhi bisan naila ang Davao nga tolerant sa mga kalihukan sa mga militante sama sa KMP.

Gitug-an sa iyang mga kauban ug sa iya mismong igsuon nga nakadawat si Celso og mga bahad sa iyang kinabuhi pinaagi sa cellphone ug pagsunod-sunod kaniya apan sama sa ubang nag-una kaniyang mga martir sa baruganan, gibaliwala kini niya.

Tungod sa daghang trabaho ug sa kamahal na sa pamasahe, napugos si Celso sa pagpuyo sa ilang opisina sa Ma-a hangtud nga didto na siya gibanhigan sa mga mamumuno.

Walay makitang motibo ang iyang pamilya, kauban ug mga higala sa iyang kamatayon kondili tungod sa iyang baruganan pabor sa katungod sa mga mag-uuma ug sa pakigbisog sa katawhang linupigan gikan sa kuko sa mapahimuslanong sistema sa katilingban.

Sa niaging mga semana, lantad kaayo si Celso ug KMP sa mga kalihukang pagpalagpot kang GMA, pagpataas sa suholan sa mga mamumuo, pagbasura sa oil de-regulation law ug sa trade liberalization law nga maoy nakapasamot sa kalisod sa kabus. Aktibong niapil ang KMP sa pagprotesta sa tumang militarisasyon didto sa ComVal ug kasikbit nga probinsiya nga nakaapekto sa libuan ka mga mag-uuma, lumad, kababayen-an ug kabataan. Matud pa nila dili puro counter-insurgency ang aksyon sa AFP kondili aron mosutoy ang plano sa mga langyawng korporasyon sa mina nga nagkisikisi nang mo-operate sa maong lugar.

Base sa kasaysayan, ang problema sa peace and order maoy makapahaw-as sa katawhan sa ilang mga pinuy-anan ug kayutaan busa dali ra kining ilugon sa mga dagkong korporasyon.

Sa laing bahin, kusganon usab ang kalihukan nila ni Celso uban sa nagkadaiyang grupo sa pag-extend sa Comprehensive Agricultural Reform Program (CARP) tungod kay wa pa kini katubag sa problema sa kawad-on sa yuta ug kakabus sa mga mag-uuma. Malinawong pagpanaw Celso!

(Mayo 21, 2008 isyu)