Huwebes, Hulyo 19, 2007

Hubog nga sekyu gipriso

USA ka hubog nga security guard nadakpan ug gipaslak sa prisohan human siya gikatahong nagpabuto sa iyang armas samtang nag-duty sa iyang gitrabahoan sa Baliok, Talomo district, dakbayan sa Davao niadtong Martes sa gabii.

Natanggong kagahapon sa selda sa Talomo police station giilang si Ismael Lozada, 41 anyos, giingong security guard nga nadestino sa Susana Homes sa Baliok ug molupyo sa Barangay 2-A, Magallanes, ning siyudad.

Sumala sa taho nga nahipus gikan sa Talomo police precinct nga alas 10:45 sa gabii, nakadawat og reklamo ang kapulisan gikan sa mga molupyo sa nasangpit nga lugar kay nakabati sila og duha ka mga lanog nga buto sa pusil.

Human nakadawat sa impormasyon, mga sakop sa Talomo police miresponde gilayon sa nahisgutang dapit ug maoy ilang naabtan ang suspetsado nga naghubo sa iyang T-shirt ug nagtago sa sagbotan nga bahin sa may basketball court sa Barangay Nalum, Baliok.

Gikabutyag nga "on duty" ang sekyu niadtong tungora apan lango kini sa makahubog nga ilimnon samtang nagtrabaho ug siya ang gikatahapang nagpabuto og armas.

Sa iyang pagkasikop, nasakmit sa kapulisan gikan sa iyang posisyon ang usa ka .38 nga rebolber nga adunay lima ka mga bala.

Ang kapulisan padayon pang mihimo og imbestigasyon kon si Lozada ba gyud ang nagpabuto ug kon sakto ba sa mga papeles ang armas nga nasakmit gikan kaniya dihang siya gisignit sa mga pulis. (RCO)

(Hulyo 19, 2007 isyu)