Huwebes, Hulyo 19, 2007

Magsilingan nagdunggabay, naospital

DUHA ka managsilingan didto sa Island Garden City of Samal (Igacos) nadala sa ospital sa siyudad sa Davao human sila nakaangkon og mga samad dinunggaban tungod sa panag-away.

Mitugpa sa Davao Medical Center giilang sila si Alberto Leoberas, 38 anyos ug Ireneo Flores, 25, pulos molupyo sa Barangay Sion, Kaputian district, Igacos.

Sumala sa impormasyon nga nakaabot sa bay tambalanan, nahitabo ang insidente alas 11:45 sa gabii sa nahisgutang lugar.

Sa duha ka mga nasamdan, si Leoberas ang medyo anaa sa delikadong kahimtang gumikan kay sa tiyan ug dughan ang iyang mga nahiagomang samad dinunggaban.

Si Flores sa iyang bahin nakaangkon og samad agi sa kutsilyo tumong sa iyang pus-on.

Matud ni Flores didto sa ospital nga iyang ag-agaw ang gikaaway ug gikadinunggabay ni Leoberas niadtong higayona.

Wa hinuon gikabutyag sa taho kon unsa'y ilang giawayan ug kon impluwensiyado ba sila sa makahubog nga ilimnon.

Miduol si Flores sa duha nga nag-away aron unta iyang uwangon apan hasta siya nadunggaban na man sab hinuon sa iyang pus-on.

Didto na mikalma ang panag-away dihang aduna na'y dugo nga mibanaw ug duna na'y nalup-og.

Daling gidala sa ospital ang duha ka mga samad samtang ang kapulisan sa Kaputian mihimo pa og dugang imbestigasyon unsa gyud ang sinugdanan sa hitabo ug kon si kinsa sab ang sad-an nga angayang manubag sa balaud. (RCO)

(Hulyo 19, 2007 isyu)