Huwebes, Hulyo 19, 2007

Martial law na pod?
Ni Emmanuel C. Roldan
Nota Bene

KON si National Security Adviser Sec. Gonzales ang pagbut-on, dugay na niyang gipahamtang ang Human Security Act (HSA) o ang gitawag nga anti-terrorism law. Gipirmahan na ni GMA ang kontrobersiyal nga balaod ug magsugod ang implementasyon niini sa Hunyo 15 bisan wa pay implementing rules and regulations (IRR). Usa si Gonzales sa mga hugot nga misuporta sa pagpasa sa maong balaod aron mawagtang na ang mga rebelde sa katilingban, daghan niini mga daang kauban ni Gonzales sa kalihukan. Buot sa HAS nga bantayan ang tanang grupo, tapok, personalidad, apil na ang media nga may planong mohulga sa kahusay ug kalinaw sa nasud. Gideklara na nga terorista ang CPP/NPA ug ang Abu Sayaff Group busa mas sayon na ang pagsikop nila karon nga may balaod na.

Apil nga mapasakaan og kaso ang mga nagtabang sa pagtipig ug nagsuporta niining grupoha ug sa bisan kinsang grupo nga gipanid-an sama sa panahon sa martial law. Tungod niining mga dili klarong probisyon sa HSA, daghang mga grupo ang mibatok niini ilabi na kadtong mga militante nga gidudahang may koneksiyon sa mga rebelde. Matud pa nila nga mibalik na sab kita sa panahon sa martial law diin gipihig ang katungod sa prensa ug pagsulti sa matuod. Wa nay pwedeng mosulti pa batok sa gobyerno aron dili madudahang terorista. 

Sa tinuod, mora'g gidali kinig palusot sa gobyerno aron magpabilin kitang humot ug nindot sa panan-aw sa Amerika nga nag-una-una sa pagbatok sa terorismo sa kalibutan. Sa giyera sa Iraq, nagpadala ang atong kagamhanan og contingent nga mga doktor bisan og nagkinahanglan kita'g mga doktor dinhi aron lang ipakita nga apil ta sa nations of the willing ug sa war on terror nga gimugna ni presidente Bush sa Amerika.  Kuyaw tuod kining HSA kay si bisan kinsa ra ang pwedeng madudahan ug bisan misulti ang kagamhanan nga may mga safety nets alang niini, dakong purohan gihapon nga maabuso kini sa mga anaa sa gahum. Bisan gani ang CBCP ug si Cardinal Vidal sa Cebu mismo mipahayag sa ilang kabalaka nga maabuso kining balaod. Nindot man nga mabantayan ug malikayan nato ang hadla sa terorismo apan kon ang katawhan na hinuon ang ma-terrorize tungod sa balaod, mas terorista pa tingali ang gobyerno kaysa ang gibantayang mga rebeldeng terorista.  Manghinaut lang ta nga tinuod ang gisulti ni GMA ug sa iyang mga sakop sa gabinete nga dili mahimong pamaagi sa pag-abuso ug may mga matino pa kitang mga sakop sa kapulisan ug kasundalohan nga dili buta nga mosunod sa mga sugo sa balaod nga dili haum sa balaod sa tawo ug sa langit.

Nahibal-an nato sa atong kasaysayan nga way nalipay sa martial rule ni Marcos, hinunua nagdala hinuon kini og kahadlok, kasakit ug kamatay sa mga hingtungdan. Naghatag kini'g dautang imahen sa nasud nga giyam-iran sa mga tawo nga nagmahal sa tawhanong katungod ug kalinaw. Bisan gani karon wa pa mahimutang ang patay nga lawas sa kanhi diktador ug hangtud karon daghan pang mga nabiktima sa iyang kabangis nga nangita pa'g hustisya sa nahitabo kanila.

(Hulyo 19, 2007 isyu)