Miyerkules, Mayo 14, 2008

18 anyos gibugha
Ni Mel Coronel

LAING 18 anyos na usab ang gipusil sa ulo sa wala mailhing mga suspetsado sakay sa motorsiklo, alas 2:20 Lunes sa hapon.

Ang kapulisan sa Bula nag-ila sa biktima si Epedilito Vallenti, walay trabaho ug molupyo sa block 1, Santiago Subdivision, barangay Bula ning dakbayan sa General Santos.

Si Roger, amahan sa biktima, nagbutyag nga gipukaw siya sa iyang mga anak ug asawa tungod kay gipusil ang ilang anak samtang nag-istambay gawas sa ilang panimalay.

Usa ka tawo miduol sa nahimutangan sa biktima ug walay daghang istorya gipusil sa iyang ulo makaduha ka higayon. Naigo usab sa liog si Epedilito.

Gisapupo sa amahan ang iyang anak ug gipasakay sa balay tambalanan apan alas 4:45 sa hapon sa susamang adlaw nabugtoan sa iyang gininhawa ang batan-on samtang giatiman sa mga mananambal sulod sa General Santos City Hospital.

"Wala lagi koy masulti sa binuhatan sa akong anak, basta giila man daw ni siya nga lider sa ilang grupo kay ang iyang mga barkada mga gagmay pa man sa iyaha, ambot unsay sala sa akong anak nganong nahimo sa mga suspek ang pagpusil.

Hinuon, permi lang gyud ni siya nagalakaw matag gabii, istorbo man gani sa among pangatulog tungod kay mouli na siya kaadlawon na," matud sa amahan sa biktima.

Mga sakop sa Bula Police Station wala pay matudlong suspek  tungod kay wala silay nakuhang mga testigo nga nakakita sa  pagpamusil.

Karong bulana mao na kini ang ika-unom nga biktima sa pagpamusil sa siyudad diin mga suspek gitudlong gun- for- hire nga nagalihok sa siyudad. (Mel Coronel)

(Mayo 14, 2008 isyu)