Biyernes, Agusto 1, 2008

Magsuon nag-unay, samdan
Ni Mel Coronel

DUNGANG gidala sa pribadong hospital ning dakbayan sa General Santos ang duha ka mga magsuon human nagdunggabay tungod sa bangi sa yuta sa barangay Malandag, Malungon, Sarangani Province, alas 2 sa kaadlawon, Miyerkules.

Ang duha nailhan nga sila si Paulino, 22, minyo ug si Christopher Daroy 24, minyo ug pulos molupyo sa nahisgutang barangay.

Matud ni Benigno, amahan sa duha ka biktima, nga nahitabo ang insidenti sa dihang nag-inom sa usa ka tindahan si Paulino uban sa silingan tungod kay dunay birthday apan mibutho ang maguwang nga si Christopher nga perting huboga sab ug nahitabo ang ilang lalis.

Gisukmatan matud pa ni Christopher ang manghud tungod kay wala niini giatiman ang yuta nga gipatikad sa laing tawo, hinungdan nga nasuko ang manghud.

Tungod sa kaulaw nga siya gisukmatan iyang gisumbag ang maguwang, apan mibalos kini gamit ang kutsilyo nga gihansak ngadto sa kilid sa manghud. Apan mibalos ang manghud og dunggab human nailog ang kutsilyo gikan sa maguwang.

"Ambot unsay nangakaon sa akong duha ka mga anak nganong nahimo man nila kini, sa kapigaduhon karon nangita pa sila og problema, kini laging dili magpautang og istorya hinungdan nga nagbinaslanay og dunggab, tungod lang kini sa ilang mga garbo kay pulos man mga hubog," asoy sa amahan nga si Benigno.

Ang duha gisapupo sa mga silingan ug gidala sa Municipal Hospital apan gipangbalhin sa siyudad tungod sa kadagko sa ilang mga samad.

Ang 22 anyos nasamdan sa tuong bahin sa kilid sa tiyan samtang ang maguwang sa iyang tiyan gamit ang usa ra ka kutsilyo.

Ang duha nag-uban sa usa ka kwarto sa General Santos City Doctors Hospital.

Hinuon, luwas na sa talandugong kahimtang ang duha ug nagpaalim na lang sa ilang mga samad samtang ang amahan gipangbasol ang duha sa ilang mga gipanghimo.

(Agusto 1, 2008 isyu)