Sabado, Agusto 30, 2008

Nagbitay sa kahoy, dugta na
Ni Mel Coronel

USA ka 29 anyos nga lalaki nagbitay ug patay na sa punoan sa kahoy gamit ang bagon sa barangay San Jose, alas 11 sa buntag, Huwebes.

Ang kapulisan sa Fatima Police Station nag-ila sa nagpakamatay nga si Kenneth Ganton, 29, buwag sa asawa, dunay tulo ka mga anak, molupyo sa sitio Blagan sa maong barangay.

Sa imbestigasyon sa kapulisan nasuta nga Agosto 23, 2008 pa nagpatala sa kapulisan ang ginikanan sa biktima human milakaw nga wala mananghid ug gibiyaan lang ang iyang tulo ka mga anak.

Si PO2 Rogelyn Anito, imbestigador sa kapulisan, nagbutyag nga iyang nahinabi ang ginikanan sa biktima kina nagtug-an nga balatian sa panglawas ang hinungdan nganong nahimo sa biktima ang pagkutlo sa iyang kinabuhi.

"Lima ka adlaw ng nawala ang biktima gani gipangita kini sa iyang mga kaparentihan apan sulagma nga nakit-an sa usa ka tawo nga nagtugway sa iyang hayop nga nadugta na", matud sa pulis.

Mga sakop sa Scene of the Crime Operatives (SOCO) nalisdan sa paghiling sa lawas tungod kay nadugta og nangatangtang na ang iyang mga panit sa lawas. Ang biktima nagsul-ob og puting t-shirt, maong nga short samtang nakalambod pa sa iyang liog ang usa ka bagon dihang naabtan sa mga otoridad.

"Sa among nasayran nga dugay na dunay plano ang biktima nga magpakamatay tungod sa iyang balatian nga maoy gisulti sa iyang ginikanan, apan kining tanan amo pang ginaimbestigahan kung unsa pa ang tinuod nga hinungdan," dugang ni PO2 Anito.

Sa kasamtangan ang patay'ng lawas sa 29 anyos gidala sa Labajo funeral homes apan ang pamilya nagsalikway sa pagduda nga dunay foulplay kay nakombinsi sila nga ang biktima nagpakamatay.

(Agusto 30, 2008 isyu)