Sabado, Agusto 30, 2008

Mga opisyales naga-apela untatan na ang pinatyanay sa Lake Sebu

Koronadal City --- Naga-apela ang mga opisyales sang banwa sang Lake Sebu, probinsya sang South Cotabato sa duha ka mga faction sang Moro Islamic Liberation Front (MILF) nga mag-untat na sang tirohanay kag pinatyanay para sa kalinong sang amo nga lugar.

Gin-awhag sang mga opisyales sang Lake Sebu, sa panguna ni Mayor Basilio Salif, ang mga grupo nanday Kumander Kimboy kag Kumander Nobon nga istoryahan ang ila problema sa lamesa imbes nga magpinatyanay.

"Walang problema na hindi mapag-uusapan. Shooting and killing to each other will only aggravate the problem. Dapat mag-usap na sila para sa peace and development ng Barangay Ned," siling ni Mayor Salif sa long distance interview sa iya sang SuperBalita.

Gusto ni Mayor Salif kag sang iban pa nga mga opisyales didto nga ma-untat na na ang ginamo sa amo nga banwa tungod kay na-apektohan na ang turismo.

Ang banwa sang Lake Sebu amo ang paborito sang mga turista nga kadtoan tungod sa iya "Baguio City-like weather," ang iya "Seven Falls," ang iya mga mouth-watering native tilapya kag mga cottage nga ginpatindog sa ibabw sang nasambit nga lake.

Natukiban sang SuperBalita nga ang nasambit nga si Kimboy ang isa ka aktibo nga field commander sang grupong-MILF nga nakabase sa boundary sang South Cotabato kag Sultan Kudarat.

Samtang si Kumander Nobon naman iya amo ang lider sang mga miyembro sang mga MILF nga nag-surender sa gobyerno kag matawhay ini sila nga nagapangabuhi sa Barangay Ned sang amo nga banwa.

Base sa report nga nakuha sang SuperBalita, nag-umpisa ang pinataynay sa amo nga barangay makaligad ang pila ka mga adlaw nga ginpatay si Kumander Nobon. Gina-alegar nga grupo ni Kumander Kimboy ang nag-ambush sa kanday Nobon kag sa duha sini ka mga tinawo sa Sitio Kitae sang nagligad nga Agosto 12.

Gintumod sang mga polis didto ang "land conflict" isip amo ang rason kun ngaa naglungtad ang amo nga insidente.

Makaligad ang duha ka mga adlaw, isa ka public teacher, ginkilala nga si Balomol Sigalong, 56-anyos, kag isa ka sitio leader nga si Bapa Buat Bacoloran, 58, ang ginpamusil kag nagkalamatay sang wala makilal-an nga mga tawo.

Ang nasambit nga duha ka mga biktima ang pareho nga sakop sang tribo nga Maguindanao.

Suno pa sa mga polis didto, ang nasambit nga mga biktima ang gina-alegar nga ginpamatay sang mga upod ni Nobon, kun sa diin isa ka miyembro sang tribo nga Uga Tubo (boot silingon, mga "blade people" kag mga "warrior").

Gina-alegar nga nagbalalos lang ang mga upod ni Nobon sa pagkapatay sini sa kamot ni Kumander Kimboy. (RHB)

(Agusto 30, 2008 isyu)