Naglibog ko kon unsay tumong sa pagpangayo og Temporary Environmental Protection Order (TEPO) niining kaso nga gisang-at sa mga taga lungsod sa Cordova tungod niadtong isyo nga oil spill sa miaging tuig.
Sama man gud kini og usa ka temporary restraining order nga mopahunong o mopakgang sa pagkadaot sa kinaiyahan.
Ang maong oil spill resulta niadtong pagbangga sa Sulpicio Express Siete sa Saint Thomas Aquinas nga hinungdan sa pagkalunod niini. Nabuslot ug nalunod ang Saint Thomas Aquinas ug niawas ang lana nga gikarga niini. Ang bul-og sa maong lana gianod sa dagat padulong sa baybayon sa Cordova.
Nahitabo kini kapin na sa usa ka tuig nga milabay.
Sa miaging Biyernes gipahigayon ang unang hearing sa maong kaso diha sa sala ni Judge Merciditas Dadole-Ygnacio sa Branch 28 sa Mandaue Regional Trial Court.
Ug atong nabantayan nga gilalisan dayon sa mga abogado mao kining Temporary Environmental Protection Order kun Tepo.
Teknikal kaayo ang ilang gilalisan ug kasagaran ang mga punto kabahin sa procedure niining Tepo.
Ambot kon nagdukaduka lang ko apan wa ko makakuha sa rason nganong gikinahanglan ang Tepo karong nilabay na ang kapin sa tuig human sa hitabo.
BAGUIO
Sa laing kaso diin gihatag sa korte ang Tepo ngadto sa mga petitioners, duna gyuy giingong urgency aron mahatag kini.
Kining kasong akong gihisgutan naglambigit sa kampanya sa mga taga Baguio alang sa pagluwas sa ilang mga karaang kahoy sa miaging Abril 2012.
Ang maong mga kahoy putlunon aron mabuhatan ang maong dapit og parking lot sa SM mall didto sa Baguio. Nidangop ang mga taga Baguio sa korte aron mababagan ang maong pagputol kay makadaot sa kinaiyahan.
Tuod man, niisyo og Tepo si Judge Antonio Estevis, presiding judge sa environmental court sa Baguio Regional Trial Court Branch 5. Gani, iya sab kining gi-extend.
Tuod man naluwas ang mga kahoy sa Luneta Hill niadtong tungora kay napahunong man ginamit sa Tepo ang pagputol sa mga kahoy.
WA MAGDALI
Kining kaso sa Cordova, nahibulong ko kon unsay ipahunong kabahin sa isyo nga oil spill. Dugay na man gud napahunong ang maong paggawas sa lana gikan sa nalunod nga barko human kini gi-siphon mga usa ka bulan human sa sa pagkalunod.
Gani, ang Coast Guard mismo nihunong na sa pag-coordinate sa Genetron nga usa ka professional oil cleanup agency kay nahuman na man ang maong paglimpyo.
Tungod niini, unsa pa may katuyoan sa Tepo?
Gani, atong nabantayan nga wala magdali ang korte ka yang sunod hearing gitakda man sa Oktubre 10, 2014. Nisugot sab ang mga reklamante. Unsa may panginahanglan sa Tepo kon mismo ang mga reklamante wa magdali?
Naglibog ang kutaw niining magsusulat nga di intawon abogado.
PIRMA
Public service announcement alang sa mga gustong mopirma sa atong balaudnon alang sa pag-abolish sa Pork Barrel System pinaagi sa People’s Initiative. Naay signature station matag alas 5 sa hapon sa dili pa ang Novena Mass karong semanaha diha sa Holy Cross Parish sa Basak Pardo, Syudad sa Sugbo.
Salamat kaayo kanilang Fr. Lyle, Fr. Leo, kang Mam Nenen, sa mga sakop sa Student Catholic Action sa University of San Jose-Recoletus, the Parish Youth Coordinating Council, sa Kabataan Party List ug uban pa.
Sunda @anol_cebu sa Twitter