USA ka section sa SuperBalita nga magpatik sa opinyon sa katawhan bahin sa mga butang nahitabo sa atong katilingdan nga kitang tanan dunay kalambigitan.
Maayong adlaw nga Lunes sa atong mga suki sa SuperBalita.
Ning adlawa sugdan sa mga lideres sa kababayen-an ug mga advocates sa dakbayan sa Davao ang 18 ka adlaw nga kampanya nga gitawag nilang Anti-Vawc (Violence Against Women and Children) Campaign.
rAng manguna niini mao ang Integrated Gender and Development Division.
Suma ni IGDD officer-in-charge Lorna Mandin nga ang 16 ka adlaw nga kalihukan batok sa gender violence gi-obserbahan sa tibuok kalibutan gikan Nobyembre 25 hangtud Disyembre 10.
Apan giingon niya nga pinaagi sa Presidential Proclamation 1172 niadtong 2006, ang Philippine campaign gilugwayan ngadto sa 18 diyas, aron nga ilakip ang Disyembre 12 nga naila isip Anti-Trafficking in Persons Day.
Ang kampanya maglangkob sa paghatag og kahibawo bahin sa gender-based violence, paglig-on sa local work ug mag-establisar og tataw nga koneksiyon tali sa lokal ug international work aron nga tapuson ang VAW, ug uban pa.
Ang pag-obserba sa siyudad sa kampanya nagsagop sa tema nga "Malingkawasnong Katilingban alang sa Kababayen-an Panahon sa Kalinaw, Kagubot ug Katalagman.
Tinuod nga daghang pagpangabuso nga nahitabo karon sa atong katilingban. Busa, atong kining hisgutan karong semana pinaagi sa pagpatik sa opinyon sa atong mga suki.
Nia na ang atong unang mga nahinabi:
Daghang rason
"Tinuod nga daghang mga asawa nga biktima sa violence against women nga hinimuan sa ilang mga bana. Pero, daghan sab ang mga bana nga biktima sab sa pagpangabuso sa ilang mga asawa. Duna may mga asawa nga masita sa ilang bana tungod kay nagpabadlong pinaagi sa pagkuyog-kuyog sa ilang mga barkada bisan minyo na. Gipasagdan lang ang mga anak kay mas giuna ang barkada. Ang pait pa gyud kung ang ipasangil, nagtrabaho siya, pero ang tinuod diay duna siyay laing gikabuangan. Ang problema lang kay ang mga babaye lang ang naay proteksiyon sa balaod -- ang lalaki wala. Ang akong tambag sa mga bana nga gibiyaan sa ilang asawa nga atimanon ang ilang mga anak kay sila ang moagak nato sa pag-abot sa atong katigulangon." Arnold Lozada, Barangay Duterte, Davao City
Magsinabtanay
"Ang maayong himuon sa magtiayon mao ang pagsinabtanay. Dili mag-away kung naay problema aron dili mahitabo sa panimalay ang violence against women and children. Ug kung naay mga seminar bahin sama sa gender sentivity, apil mo para mahibalo mo kung unsay maayong himuon." Ester Jacildo, Masea Village, Barangay Duterte, Davao City