USA ka lalaki ang nadala sa ospital human gidunggab sa sakop sa gang didto sa Barangay Pagsabangan, dakbayan sa Tagum, Sabado sa kaadlawon.

Ang biktima nailhan nga mao si Ronald Tesano, 18, ug molupyo sa Purok Sto. Niño, sa susamang barangay.

Sa report gikan sa Tagum City Police Station nasayran nga

pasado alas 12:30 sa kaadlawon, nagbarog lamang ang biktima atubangan sa barangay hall sa nahisgutang dapit dihang kalit kining gidunggab sa wa mailhing batan-ong gituohang sakop sa gang gamit ang kutsilyo.

Nahiagum og samad dinunggaban sa kalawasan ang biktima, ug daling gidala sa Davao Regional Hospital.

Ang suspek abtik sab nga misibat padulong sa wa matinong lugar human sa pagpanunggab.

Ang kapulisan sa siyudad sa Tagum mihimo na karon og dugang imbestigasyon sa hitabo aron sayron ang motibo ug suspek sa krimen.

Gilusad na usab ang manhunt operation aron sa pagsikop sa suspek.(Marvin Pineda)