WALO ka mga balay ang gilamoy sa kalayo niadtong Dominggo, Pebrero 10, sa Barangay Macasandig ning siyudad sa Cagayan de Oro.

Anaa sa P300 mil ang natalang danyos sa sunog nga gituohang nagsugod sa balay ni Elmer Tambis.

Sa nahipos nga impormasiyon gikan sa Bureau of Fire Protection (BFP) pasado alas 11:05 nadawatan ang tawag kalabot sa sunog ug gideklara kining fire out pasado ala 1:40 sa hapon sa susama nga adlaw.

Giingong posibleng nabiyaan nga giluto ang hinungdan sa pag-ulbo sa kalayo apan wala pa usab kini makumpirma sa tinugyanan sa BFP.

Karong panahona padayon pa ang tinugyanan sa BFP sa imbestigasiyon aron masuta ang tinuod nga hinungdan sa maong kalit nga pag-ulbo sa kalayo.

Kasamtangang gi-atiman na usab sa mga opisyales sa barangay ang 18 ka mga pamilya nga nabiktima.