PATAY ang usa ka lalaki nga namusil sa pulis ug nabaslan mga alas 7:30 sa gabii sa Sitio Tower P-6B, Barangay Poblacion, Kadingilan, probinsya sa Bukidnon.

Sa pasiunang imbestigasyon, si Police Corporal Johnny S. Padillo usa ka Intelligent Operative sa Kadingilan Municipal Police Station (MPS) pauli na niadtong tungora sakay sa iyang motorsiklo dihang namatikdan nga adunay nagsunod kaniya nga motorsiklo.

Kalit lang namusil sa polis ang duha ka suspek apan wala nakaigo.

Tungod niini, gibaslan kini sa polis hinungdan naigo ang angkas ug nahulog sa motorsiklo.

Ang kaubang driver niini daling nakasibat.

Si Padillo daling nanawag sa rescue team ug gidali og dala sa balay tambalanan sa dapit ang napusilan.

Lima ka samad pinusilan naangkon sa suspek nga sa kinauwahian nailang si John Mark Gonzales, taga Barangay Kiara, Don Carlos, Bukidnon nga gideklarar sa mga doktor nga dead on arrival.

Dihang gisusi susi sa kapolisan ang nagkadaiyang parte sa kalawasan niini nakita ang usa ka pakete sa gitouhang shabu ug usa ka unit sa kalibre .45 nga adunay duha ka mga buhing bala.

Motibo sa polis pagsunod ug pagpamusil sa pulis padayon pa nga gisuta.