GIPASABOT ni Department of the Interior and Local Government (DILG) -Northern Mindanao Director Arnel Agabe nga ang bag-ong normal nga pangkinabuhi aduna nay mga angayan nga tumanon.

Matud niini nga ang mao ang gitawag nga pagdisiplina sa kaugalingon aron maobserbar ang social distancing, pagpuyo sa balay kung wala'y importanteng lakaw, ang paglikay sa mass gatherings ug uban pa.

Giawhag sab niini ang mga local government unit (LGU) nga magpanday o mohimo og polisiya nga mahingusgan ang new normal sa ilang mga lomulopyo aron mapugngan ang pagdaghan sa kaso sa Covid-19.

Sa iyang bahin, si Governor Bambi Emano nagpasabot nga ang pagpahigayon og flag raising pinaagi sa Zoom video conference ang new normal sa klase sa pagserbisyo sa kapitolyo.

Gibutyag niini nga pito na ka semana nga gipaagi sa virtual ang flag raising lakip ang mga turnover.

Naglaraw usab ang Misamis Oriental nga mohimo ug lugar sa matag buhatan sa departamento nga maoy area aron didto ipahigayon ang video conference aron maayo ang background niini kung makigtransaksyon sa national ug international sa umaabot.

Samtang si Cagayan de Oro Mayor Oscar Moreno nisulti nga ang new normal sa katawhan mao kining pagsunod sa public health guidelines labina kung mogawas sa puloy-anan, motrabaho, mopalit sa panginahanglanon ug uban pa.

Kini samtang wala pa gihapon tambal alang sa Corona Virus disease.