Kon duna may nakakuha og dakong atensiyon sa pagsugod sa round 1 sa NBA playoffs karon, usa na niini kining panag-abot sa Los Angeles Lakers ug Memphis Grizzlies sa Western Conference.

Ang Lakers daw og sa usa na ka bag-ong team sukad nihimo kini og gamay nga kausaban sa ilang lineup atol sa trade deadline.

Nakadibuho gilayon kini og 16-7 nga baraha human sa All-Star break ug nikatkat gikan sa ika-13 nga luna ngadto sa ika-7 sa West standings.

Pormal nilang naangkon ang maong puwesto sa dihang ilang gipukan ang Minnesota Timberwolves sa Play-In Tournament.

Ang Grizzlies, sa ilang bahin, maoy niangkon sa ikaduhang puwesto pinaagi sa 51-31 nga baraha.

Ang kabatan-on ug ang ka presko sa ilang tuhod nga gipangulohan sa lisod pugngan nga si Ja Morant maoy usa sa mga mahait nilang hinagiban ug igong rason kon nganong anaa sila sa ikaduhang puwesto sa West.

Sa kasaysayan sa team, kini maoy ilang ikaupat nga pinakataas nga record nga nahimo sa regular season.

Ug tungod niini, ang ilang silbing gasa mao ang pagpakigharong sa team nga gibituonan ni LeBron James ug Anthony Davis.

Kon atong hisgutan ang regular season, sa tulo nila ka mga duwa, kaduha mapildi sa Lakers ang Memphies.

Enero 20 - Lakers 122, Grizzlies, 121; Pebrero 28 - Grizzlies 121, Lakers 109; Marso 7 - Lakers 112, Grizzlies 103.

Apan dili angay nga ang ilang panagsangka sa regular season maoy haom nga basehan sa playoffs.

Kini tungod kay gawas sa ilang mga adjusment sa duwa, dunay kausaban sa ilang lineup.

Niadtong Enero 20 nga duwa, si Russel Westbrook nga mitali og 29 puntos, unom ka assists ug lima ka rebounds wala na sa Lakers karon human kini gi-trade.

Ning mao usab nga panag-engkuwentro, ang bigmen sa Memphis nga sila si Steven Adams ug Brandon Clarke kinsa nagkumboya og 36 puntos ug 27 ka rebounds, di usab ka duwa sa playoffs tungod sa injuries. Kini mahimong makaapekto usab sa Grizzlies.

Sa ilang sangka sa Pebrero 28 ug Marso 7, wala si LeBron James tungod sa foot injury nya wa usab si Ja Morant nianang pagka Marso tungod kay gisuspenso kini sa NBA kalabot niadtong kontrobersiya nga pagdala niya og armas.

Ang Lakers ug Grizzlies pulos nalakip sa best rebounding teams. Di usab iglagyo ang ilang percentage sa three-point area. Apil usab sila sa top five sa fastbreak points.

Ug sa sinugarol nga termino, limag-lima ang ilang tapad. Tungod niini, mga NBA analysts sa US maayong pagkabahin sa ilang tagsa-tagsa ka mga panglantaw.

Ang Game One sugdan karong Lunes sa kadlawon dinhi sa atoa.

Sa akong hamubong pangagpas, Lakers in 7.